Diferenca në çmim mes raftit dhe arkës i kushtojnë shtrenjtë gjigantit të veshmbathjeve, reagon kompania

Shpeshherë blerësit përballen me situata zhgënjyese ku shifra e vendosur në raft ndryshon papritur në momentin e pagesës në arkë. Një praktikë e tillë e mospërputhjes së çmimeve i ka sjellë dy gjoba të njëpasnjëshme kompanisë ndërkombëtare të veshjeve “LC WAIKIKI RETAIL KOSOVO” SH.P.K. në dy qytete të ndryshme, pas verifikimit të ankesave nga ana e Inspektoratit të Tregut. Sipas të dhënave zyrtare të lëshuara nga Ministria e Industrisë, Ndërmarrësisë, Tregtisë dhe Inovacionit (MINT), biznesi në fjalë është ndëshkuar dy herë brenda një periudhe të shkurtër kohore me nga 1,000 euro secila, për shkelje të dispozitave të Ligjit për Mbrojtjen e Konsumatorit: Rasti i parë u shënua në Prizren (Vendimi i datës 03.04.2026): Pas një denoncimi të bërë nga një konsumator, Inspektorati konstatoi se për artikullin “Gjinse”, çmimi i shfaqur në etiketë ishte 24.95 €, ndërsa në sistemin e arkës u faturua 26.95 € (2 euro më shumë). Për këtë parregullsi, pika e shitjes nr. 5 në Rrugën “Tirana” në Prizren u gjobit me 1,000.00 euro. Rasti i dytë u regjistrua në Ferizaj (Vendimi i datës 16.04.2026): Më 15 prill, një tjetër qytetar raportoi një anomali të ngjashme për produktin “Atlete”, ku çmimi në rafte figuronte 16.95 €, kurse në kuponin tatimor doli 17.95 € (1 euro më shtrenjtë). Inspektorati mori vendim të nesërmen, duke gjobitur njësinë e vendosur në Rrugën “Ahmet Kaçiku” në Ferizaj me shumën prej 1,000.00 euro. Në të dyja rastet e verifikuara, autoritetet inspektuese gjetën shkelje të neneve 16 dhe 26 të Ligjit për Mbrojtjen e Konsumatorit, duke rikujtuar se subjektet tregtare kanë detyrim ligjor të garantojnë përputhshmërinë e plotë mes çmimit të ekspozuar dhe atij në arkë. Lidhur me këto zhvillime, menaxhmenti i “LC Waikiki” ka ofruar sqarimet e veta zyrtare, duke i cilësuar ngjarjet si lëshime të natyrës teknike: “Dy rastet të cilave u referoheni kanë të bëjnë me mospërputhje të izoluara të natyrës teknike dhe operative gjatë procesit të përditësimit dhe harmonizimit të çmimeve.” Më tej, nga kompania kanë arsyetuar se shtrirja e gjerë e dyqaneve dhe qarkullimi i madh i mallrave ndikojnë në këto raste: “Duke pasur parasysh rrjetin e gjerë të dyqaneve tona në Kosovë, numrin e konsiderueshëm të produkteve që tregtojmë dhe vëllimin e lartë të shitjeve që realizohen në baza ditore, këto dy raste përbëjnë ngjarje të izoluara dhe me efekt tepër të kufizuar në raport me veprimtarinë dhe vëllimin e përgjithshëm të shitjeve të kompanisë.” Përfaqësuesit e brendit kanë theksuar se aplikojnë protokolle strikte kontrolli, të cilat përfshijnë auditimin e çmimeve, sinkronizimin e sistemeve të shitjes dhe trajnimin e vazhdueshëm të stafit. Sipas tyre, këto raste trajtohen me seriozitet maksimal për të përmirësuar mekanizmat e brendshëm në çdo pikë shitjeje. Në fund, nga “LC Waikiki” kanë përsëritur se zotërojnë politika transparente për mbrojtjen e blerësve: “Mbrojtja e interesave ekonomike të konsumatorëve mbetet prioritet i kompanisë. Në këtë drejtim, LC Waikiki ka politika të qarta për mbrojtjen e konsumatorit dhe mekanizma të brendshëm për trajtimin dhe korrigjimin e mospërputhjeve eventuale të çmimeve, duke përfshirë edhe kthimin e çdo diference të paguar si rezultat i një mospërputhjeje të tillë. Këto mekanizma synojnë të sigurojnë që konsumatorët të mos bartin pasoja financiare nga lëshimet eventuale të natyrës teknike apo operative.”