Haxhiu zbulon kushtin për rikthimin e Bekim Sejdiut në garën presidenciale

Ushtruesja e detyrës së presidentes së Kosovës, Albulena Haxhiu, ka bërë të ditur se Bekim Sejdiu mund të rikthehet sërish si kandidat për kreun e shtetit, nëse gjashtë deputetët e LDK-së që më parë nuk e mbështetën, ofrojnë garanci se do të marrin pjesë në seancën e Kuvendit gjatë procesit të votimit. Sipas Haxhiut, vendimi i Sejdiut për t'u tërhequr nga gara erdhi pikërisht si pasojë e mungesës së këtij përkrahjeje parlamentare. Megjithatë, ajo ka theksuar se dakordimi mes Lëvizjes Vetëvendosje dhe Lidhjes Demokratike të Kosovës lidhur me këtë kandidaturë mbetet ende i vlefshëm dhe në fuqi. “Kandidati për president është zoti Bekim Sejdiu. Ai u tërhoq nga gara për shkak se nuk e kishte mbështetjen e gjashtë deputetëve të LDK-së, të cilët nuk e përkrahën. Ne nuk jemi tërhequr nga marrëveshja. Jam e bindur se, nëse do të ketë një deklarim se ata do të qëndrojnë në sallë, zoti Sejdiu do të rikthehet. Ai u tërhoq sepse nuk i kishte votat”, ka deklaruar ajo. E pyetur për mundësinë e rikandidimit, Haxhiu ka shtuar se kjo mundësi bëhet e prekshme nëse sigurohet numri i nevojshëm i votave në legjislativ, duke vlerësuar lart profilin dhe integritetin e tij të spikatur profesional e moral. “Mendoj se, nëse ka garanci se janë 2/3-at në Kuvend, atëherë ai do të rikthehet. E kam vlerësuar faktin që ai pranoi të jetë kandidat i përbashkët i Vetëvendosjes dhe LDK-së, ndërsa çmoj integritetin e tij të lartë profesional dhe moral. Zoti Sejdiu ka shërbyer me dinjitet kudo ku ka qenë, ndaj kam konsideruar se një figurë e tillë është e përshtatshme për postin e presidentit”, u shpreh Haxhiu. Lidhur me përpjekjet për kapërcimin e ngërçit politik, ajo ka bërë të ditur se bisedimet po udhëhiqen nga kryeministri në detyrë dhe kryetari i Vetëvendosjes, Albin Kurti, duke u bërë thirrje subjekteve politike që të dëshmojnë maturi dhe qasje konstruktive. “Negociatat i drejton kryeministri Kurti, njëherësh kryetari i Vetëvendosjes, dhe nga këto takime mund të dalin çështje me rëndësi për të çuar përpara proceset dhe për të shmangur dërgimin e vendit në zgjedhje të parakohshme. Besoni se gabimi më i madh që mund të bëjmë tani, veçanërisht pas vendimit të Hagës, do të ishte ta çonim vendin në zgjedhje të parakohshme. Prandaj u bëj thirrje partive politike për seriozitet dhe konstruktivitet”, përfundoi ajo.