Malmo bëhet gati për protestë: Thirrje masive në mbështetje të ish-krerëve të UÇK-së

Platforma qytetare “Liria Ka Emër” ka bërë të mundur organizimin e një proteste gjithëpërfshirëse në qytetin e Malmos, e cila do të zhvillohet nesër, më 3 tetor, në shenjë solidarizimi dhe mbështetjeje për luftëtarët e lirisë. Tubimi masiv është parashikuar të nisë nga ora 14:00. Sipas organizatorëve, pritet një pjesëmarrje e gjerë e diasporës shqiptare që jeton e vepron në Malmo dhe rajonet përreth, për të dëshmuar solidaritetin e tyre. Përmes një apel publik, nismëtarët u kanë bërë thirrje të gjithë bashkatdhetarëve që të bashkohen në këtë tubim, duke kërkuar që protesta të zhvillohet në mënyrë plotësisht paqësore dhe me nivel të lartë dinjiteti qytetar. Kjo ngjarje sensibilizuese po organizohet nën thirrjet unifikuese dhe motot “Jo në emrin tim” dhe “Liria Ka Emër”, të cilat kanë shoqëruar fushatat e ngjashme në mbrojtje të vlerave të luftës.