Udhëtimi Shkup–Prishtinë për vetëm 50 minuta: Hekurudha e re dhe autostrada Bllacë pritet të lidhin dy kryeqytetet

Ndërmarrjet hekurudhore të Maqedonisë së Veriut dhe Kosovës janë duke bashkëpunuar ngushtë për të bërë realitet linjën e re direkte të trenit mes Shkupit dhe Prishtinës, e cila pritet të jetë funksionale gjatë vitit të ardhshëm me një kohë udhëtimi prej rreth 50 minutash, sipas njoftimit zyrtar nga koalicioni VLEN. Sipas këtij njoftimi, kjo nismë do t'u ofrojë qytetarëve të të dyja vendeve një alternativë moderne transporti, duke shkurtuar ndjeshëm kohën e nevojshme për të udhëtuar për motive pune, studimi apo për vizita familjare. Krahas hekurudhës, integrimi infrastrukturor mes dy shteteve po avancon edhe përmes projektit të rëndësishëm strategjik të autostradës Shkup–Bllacë. Finalizimi i këtij aksi rrugor pritet të përmirësojë qarkullimin drejt Prishtinës dhe të optimizojë transportin e mallrave, duke u lidhur direkt me rrjetin e autostradave në territorin e Kosovës. Nga VLEN theksojnë se këto dy nisma mbajnë një peshë vendimtare për shkak të raporteve të përditshme që qytetarët dhe komuniteti i biznesit kanë në të dyja anët e kufirit, ndërkohë që kërkesat për një lëvizshmëri më të shpejtë kanë qenë të kahmotshme. Përkushtimi ynë brenda ekzekutivit mbetet konkretizimi i shpejtë i këtyre veprave, me qëllim lehtësimin e lëvizjes së qytetarëve dhe shkëmbimeve tregtare, duke i afruar edhe më shumë Shkupin dhe Prishtinën në dimensionin e përditshëm, përfundon deklarata.