Këlliçi i bën thirrje SPAK: Sekuestroni kamerat e rezidencës, provat e takimit Rama-Yeffet janë aty

Nënkryetari i Partisë Demokratike, Belind Këlliçi, ka dalë me një reagim zyrtar pas ndërhyrjes së Prokurorisë së Posaçme (SPAK) në banesën e biznesmenit shqiptaro-izraelit, Ron Yeffet. Ndërsa ka përshëndetur nisjen e këtyre verifikimeve, ai ka kërkuar një hetim të mirëfilltë dhe të thelluar për këtë çështje. Sipas Këlliçit, një nga hapat kyç që hetuesit duhet të ndërmarrin është sekuestrimi i pamjeve filmike të siguruara nga kamerat e sigurisë në kompleksin rezidencial ku jeton Yeffet. Ai pretendon se këto regjistrime mund të zbardhin detaje të rëndësishme, përfshirë edhe një takim të mundshëm mes biznesmenit dhe kryeministrit Edi Rama, i cili dyshohet se është zhvilluar më 8 shtator, menjëherë pas publikimit të përgjimeve që përfshinin ish-zv/kryeministrin Arben Ahmetaj. Duke e cilësuar Yeffet si mik të kreut të qeverisë, zyrtari i opozitës ka theksuar se akuza për trafik ndërkombëtar armësh është teskajshmërisht e rëndë dhe kërkon llogaridhënie të plotë para ligjit. Këlliçi shtoi se këtë çështje e ka denoncuar publikisht prej muajsh dhe se do ta ndjekë me vëmendje maksimale deri në zbardhjen e plotë të së vërtetës nga ana e organeve të drejtësisë.