Përplasje e fortë në aksin Lezhë-Shkodër: Taksi përplaset me autobusin e arsimtarëve, tre të plagosura

Një ngjarje rrugore është shënuar pasditen e sotme përgjatë aksit nacioanal Lezhë-Shkodër, konkretisht në afërsi të kryqëzimit të Blinishtit. Në këtë incident janë përfshirë një automjet taksi dhe një autobus i linjës që shërbente për transportin e mësuesve. Si pasojë e goditjes së fortë, tre gra kanë pësuar lëndim trupor dhe janë dërguar menjëherë drejt spitalit për të marrë trajtimin e duhur mjekësor. Sipas të dhënave paraprake nga terreni, fatmirësisht të lënduarat ndodhen jashtë çdo rreziku për jetën. Referuar dyshimeve të para, shkak i përplasjes dyshohet të ketë qenë momenti kur autobusi që transportonte trupin arsimor po hynte në superstradë, duke u goditur nga taksia që po qarkullonte në atë drejtim. Menjëherë pas njoftimit, forcat e Policisë kanë mbërritur në vendin e ngjarjes dhe kanë nisur hetimet intensive për të zbardhur plotësisht dinamikën dhe shkaqet që sollën këtë aksident.