“Të veshim Kosovën kuqezi me emblemën e lirisë”: Thirrja e Çlirim Hazirit për çdo qytetar

Çlirim Haziri, i biri i dëshmorit të kombit Xhavit Haziri dhe njkohësisht ndër organizatorët kryesorë të protestave të përditshme që zhvillohen çdo natë prej orës 21:00 kundër vendimit gjyqësor ndaj ish-udhëheqësve të Ushtrisë Çlirimtare të Kosovës, i është drejtuar me një apel mbarëkombëtar qytetarëve të vendit. Nëpërmjet një mesazhi të shpërndarë në llogarinë e tij zyrtare në rrjetin social Facebook, ai ka kërkuar ngritjen e simboleve të luftës çlirimtare në çdo cep të vendbanimeve, duke sugjeruar vendosjen e tyre në dritare, ballkone apo çdo hapësirë tjetër të dukshme, për të dëshmuar solidaritet mbarëkombëtar. “Po e veshim Kosovën me flamujt e UÇK-së! Vendose edhe ti një flamur në shtëpi, në ballkon, në dritare. Le të shihet kudo. Kosova nuk harron. UÇK-ja nuk është vetëm! UÇK, të fala nga Kosova!”, ka përcjellë Haziri në thirrjen e tij publike.