Tragjedi në Shtërpcë: Ndërron jetë në spital gruaja që mbeti e plagosur rëndë në aksidentin e 26 shtatorit

Një aksident i rëndë trafiku i regjistruar më 26 shtator në komunën e Shtërpcës ka marrë një kthesë fatale, pasi njëra prej të lënduarave nuk ka mundur t'i mbijetojë plagëve të pësuara. Sipas informacioneve zyrtare nga Policia e Kosovës, ngjarja kishte ndodhur rreth orës 10:37, kur dy automjete private u përfshinë në një përplasje, duke lënduar tre persona. Derisa dy prej të lënduarve u liruan në shtëpi pas marrjes së ndihmës së parë mjekësore, gjendja e një gruaje kosovare kërkoi trajtim të specializuar jashtë kufijve të vendit, për shkak të lëndimeve të rënda. Më 1 tetor, autoritetet policore janë njoftuar nga anëtarët e familjes se viktima, e cila po trajtohej në një spital jashtë vendit, ka ndërruar jetë si pasojë e dëmtimeve të marra gjatë aksidentit. Lidhur me këtë tragjedi, është vënë në dijeni prokurori kujdestar, ndërkohë që hetimet dhe procedurat e mëtejshme për zbardhjen e rrethanave të rastit janë duke vazhduar.