Skandal në futbollin turk: 448 zyrtarë nën hetim për baste të paligjshme dhe manipulime

Futbolli turk po përballet me një nga krizat e tij më të mëdha, pasi Federata Turke e Futbollit ka nisur hetimet zyrtare ndaj 448 personaliteteve të këtij sporti, përfshirë edhe presidentin e klubit Trabzonspor, nën dyshimet e forta për përfshirje në baste të paligjshme. Ky zhvillim vjen pas një aksioni të ndërmarrë muajin e kaluar, ku me urdhër të prokurorisë u vunë në pranga shtatë persona. Mes tyre ishte edhe kryetari i komitetit të arbitrimit të federatës, Ferhat Gudogdu. Këto arrestime pasuan një hetim disamujor që përfshin vepra të rënda penale, si falsifikimi i dokumenteve zyrtare dhe ndërhyrjet e paligjshme në procesin e emërimit dhe vlerësimit të gjyqtarëve. Si vazhdimësi e këtyre hetimeve, shtëpia e futbollit turk ka vendosur t'i përcjellë organeve disiplinore dosjet e 448 zyrtarëve që kanë shërbyer në poste administrative në klubet e divizionit të parë dhe të dytë gjatë pesë viteve të fundit. Sipas autoriteteve të federatës, këta individë janë identifikuar se kanë vendosur baste ilegale përmes platformave të ndryshme, duke gjeneruar fitime marramendëse që kapin shifrat e miliona dollarëve. Në listën voluminoze me 448 emra figurojnë zyrtarë të lartë nga klubet më të njohura të vendit, ku spikasin 13 përfaqësues nga Trabzonspor – përfshirë kreun e klubit Ertugrul Dogan – 10 nga radhët e Besiktasit, pesë nga Galatasaray dhe tre nga Fenerbahce. Paralelisht me këto masa disiplinore, procesi hetimor ka përfshirë edhe zyrtarë të fushës së blertë. Të enjten, dy gjyqtarë të elitës së futbollit turk, Yasin Kol dhe Goktug Hazar Erel, janë thirrur për t'u marrë në pyetje nga organet kompetente, pasi akuzohen zyrtarisht për “bashkëpunim në falsifikim” dhe “shpërdorim të detyrës”.