Heroizëm në Zvicër: Shqiptari nga Kosova sfidon flakët dhe shpëton katër të rinj nga vdekja e sigurt

Një akt i jashtëzakonshëm trimërie ka ndodhur në kantonin Aargau të Zvicrës, ku protagonist ka qenë një bashkatdhetar nga Kosova. Ajdin Limoni, 53 vjeç, po kthehej në banesën e tij kur vuri re një vatër zjarri, pa e menduar se pas pak çastesh do të bëhej shpëtimtari i katër të rinjve që ndodheshin në prag të një tragjedie të rëndë. Në një rrëfim prekës për mediat zvicerane, ai ka treguar detajet e asaj nate dramatike, ku së bashku me disa kalimtarë të tjerë, arriti t'i nxirrte të mbijetuarit nga automjeti që po shkrumbohej nga zjarri. Fillimisht, Limoni kishte menduar se po digjej ndonjë shkurre anës rrugës. Megjithatë, sapo u afrua, ai dalloi një makinë të aksidentuar që po digjej, me njerëz të bllokuar brenda. Edhe pse pranë vendngjarjes kishte disa dëshmitarë, askush nuk po ndërhynte. I indinjuar nga kjo plogështi, ai u bërtiti të pranishmëve: "Çfarë po prisni? Ndihmojini!". Pa u menduar dy herë, 53-vjeçari vrapoi drejt mjetit dhe hapi derën. Brenda gjeti tre djem të cilët kishin humbur ndjenjat dhe një vajzë që ishte ende e vetëdijshme. Britmat e saj të dëshpëruara vazhdojnë t'i kumbojnë në vesh edhe sot: "Më ndihmo, më ndihmo, po vdes, më ndihmo!". Limoni shprehet se ky zë rrëqethës do t'i mbetet gjatë në kujtesë. Rreziku ishte ekstrem, pasi pjesa e përparme e makinës ishte pushtuar tërësisht nga flakët, të cilat arrinin një lartësi prej rreth tre metrash. Pavarësisht dyshimeve të para se mos ishte tepër vonë, shqiptari nuk u dorëzua. Nxjerrja e të rinjve u vështirësua nga rripat e sigurisë që i mbanin të bllokuar. Ai kërkoi me urgjencë një thikë për t'i prerë ato dhe udhëzoi ndihmësit që t'i largonin të lënduarit sa më parë nga zona e rrezikut. Ky akt heroik nuk kaloi pa pasoja fizike për 53-vjeçarin. Ai pësoi djegie në duar dhe në ballë, duke përfunduar në spital për trajtim mjekësor. Ndonëse njëra nga plagët do t'i lërë një shenjë të përhershme, ai shprehet se dhimbjet janë asgjë para jetëve që u shpëtuan. Pasi mori ndihmën e parë, ai u rikthye në shtëpi po atë natë, i lehtësuar shpirtërisht që mundi të bënte ndryshimin mes jetës dhe vdekjes për katër të rinjtë. Përtej plagëve fizike, Limoni mbeti i zhgënjyer nga pasiviteti i personave që thjesht vështronin skenën pa lëvizur as gishtin. Ai thekson se në momente të tilla nuk ka kohë për të kalkuluar rrezikun personal, por duhet vepruar me zemër. Në fund, ai përcjell një mesazh të fortë sensibilizues për të gjithë: nëse shihni dikë në rrezik, mos qëndroni spektatorë, por ndaluni dhe jepni ndihmën tuaj.