Wesley Clark: Millosheviqi kishte mendje gjenocidale, Hashim Thaçi ishte patriot që mbrojti atdheun

Ish-gjenerali i NATO-s, Wesley Clark, ka hedhur kritika të ashpra ndaj Gjykatës Speciale për proceset gjyqësore ndaj ish-krerëve të Ushtrisë Çlirimtare të Kosovës. Në një rrëfim për Klan News, ai e ka cilësuar ish-liderin serb, Sllobodan Millosheviq, si një figurë me mentalitet gjenocidal, duke bërë një dallim të qartë mes tij dhe ish-presidentit të Kosovës, Hashim Thaçi, të cilin e vlerësoi si një patriot që sakrifikoi gjithçka për të mbrojtur vendin e tij në periudhën më të errët. Clark kujtoi negociatat e tensionuara të kohës, ku Millosheviqi, përkundër premtimeve për tërheqjen e trupave, vazhdonte të ushqente retorikë vrasëse ndaj shqiptarëve. “Ai më thoshte hapur se shqiptarët janë vrasës dhe përdhunues, madje shprehej se kishin ndërmend t’i zhduknin të gjithë. Edhe pse nënshkroi marrëveshjen, ai i riktheu forcat ushtarake në janar për të nisur spastrimin etnik. Nuk mund të ketë asnjë krahasim mes tij dhe Thaçit, i cili u kthye në atdhe pikërisht kur populli i tij kishte më së shumti nevojë”, u shpreh gjenerali amerikan. Duke analizuar natyrën e regjimit serb, Clark theksoi se Millosheviqi ishte i vendosur të shkatërronte UÇK-në dhe popullsinë civile përmes terrorit, plaçkitjeve dhe vrasjeve të intelektualëve. Sipas tij, ndërhyrja e NATO-s ishte një domosdoshmëri për të ndaluar këtë valë dhune që po shpërthente në terren. Në lidhje me zërat që pretendonin se ndërhyrja në Kosovë ishte bërë për të shpërqendruar vëmendjen nga skandalet e brendshme politike të administratës Clinton, Clark i cilësoi këto teori si qesharake. Ai shpjegoi se qëllimi i vetëm ishte parandalimi i një tragjedie të përmasave të Ruandës, ku rreth 800 mijë njerëz u masakruan pa ndërhyrjen e bashkësisë ndërkombëtare. Duke kujtuar masakrën ndaj familjes Jashari dhe përshkallëzimin e dhunës, Clark vuri në dukje se plani i Beogradit ishte eliminimi total i të drejtave të shqiptarëve në Kosovë. Ai bëri thirrje për një reflektim mbi të kaluarën dhe nevojën për të ndërtuar marrëdhënie më të shëndosha në rajon, duke theksuar se NATO kishte bërë maksimumin për të sjellë paqen pas dekadash konfliktesh të përgjakshme në ish-Jugosllavi.