Mitrovicë: Komuna nis shkëputjen e 27 kontratave për pronat publike për shkak të dështimit në investime

Kryetari i Komunës së Mitrovicës, Faton Peci, ka ndërmarrë hapat zyrtarë për anulimin e 27 kontratave përmes të cilave ishin dhënë në shfrytëzim prona të paluajtshme komunale. Bëhet fjalë për marrëveshje afatgjata, që në disa raste parashikonin shfrytëzim deri në 99 vjet, të cilat tashmë janë vënë në pikëpyetje për shkak të mosrespektimit të kushteve kontraktuale. Sipas kreut të komunës, shkaku kryesor i këtij vendimi është mungesa e investimeve konkrete nga ana e shfrytëzuesve. Peci ka bërë të ditur se, pavarësisht se kanë kaluar deri në një dekadë nga nënshkrimi i këtyre kontratave, përfituesit nuk kanë realizuar asnjë nga obligimet e parapara për zhvillimin e këtyre pronave. “Të gjitha pronat publike do të jenë në dispozicion për të gjithë, pa dallime e favorizime”, u shpreh Peci, duke theksuar synimin e administratës për menaxhim transparent dhe efikas të resurseve të qytetit. Në njoftimin e saj zyrtar, komuna nuk ka bërë publike detaje specifike lidhur me identitetin e përfituesve, sipërfaqen e saktë të tokave apo vlerën financiare të tyre. Megjithatë, është konfirmuar se i gjithë procesi i shkëputjes së këtyre marrëveshjeve do të zhvillohet në përputhje të plotë me legjislacionin në fuqi dhe procedurat administrative përkatëse.