Goditje rrjetit të drogës: Eldi Dizdari ekstradohet nga Dubai për t'u përballur me drejtësinë belge

Eldi Dizdari, i njohur ndryshe si Denis Matoshi apo me pseudonimet “Alduth” dhe “Shqiptari i gjatë”, i është dorëzuar drejtësisë belge pas një ekstradimi nga Emiratet e Bashkuara Arabe. 37-vjeçari, i identifikuar nga organet ligjzbatuese si një prej eksponentëve kryesorë të organizatës kriminale “Kompania Bello”, do të shlyejë dënimin prej 10 vitesh heqje lirie, të shqiptuar nga gjykatat e Belgjikës. Arrestimi i tij në Dubai dy vite më parë erdhi si pasojë e kërkesave të vazhdueshme të autoriteteve belge. Sipas informacioneve, Dizdari mbërriti të mërkurën në aeroportin ushtarak të Melsbroek, nga ku u shoqërua drejt një burgu të sigurisë së lartë. Ai rezulton i dënuar nga Gjykata e Antwerp-it me 10 vite burg dhe një gjobë prej 80 mijë eurosh, në kuadër të operacionit të koduar “Yaramis”, i cili u fokusua te trafikimi i kokainës dhe manipulimi i ngarkesave të paligjshme brenda portit të Antwerp-it. Krahas dënimit me burg, drejtësia ka urdhëruar sekuestrimin e pasurive të përfituara nga aktiviteti kriminal, me një vlerë prej 7.5 milionë eurosh. Hetimet zbuluan se pas rënies së grupit “Yaramis” si pasojë e presioneve policore, Dizdari kishte ndërtuar një rrjet bashkëpunimi me persona të tjerë, si Omar Govers dhe Najim E.M., për të siguruar nxjerrjen e kokainës nga porti. Dosja hetimore përfshin gjithashtu dyshime për pastrim parash, ku prokuroria belge ka identifikuar dy transferta të kryera gjatë viteve 2020-2021, në vlerën totale prej 1.75 milionë eurosh, të cilat i atribuohen Dizdarit. Kjo pjesë e hetimeve është veçuar për një proces të mëvonshëm gjyqësor. Emri i tij është prej kohësh në fokusin e autoriteteve shqiptare, ku SPAK e ka hetuar lidhur me rolin e tij në “Kompania Bello”, ndërsa Gjykata e Posaçme e Apelit ka miratuar konfiskimin e pasurive të tij në Shqipëri. Ministrja belge e Drejtësisë, Annelies Verlinden, e konfirmoi ekstradimin përmes një deklarate publike. Ajo vlerësoi bashkëpunimin efikas me autoritetet e Emirateve të Bashkuara Arabe, duke nënvizuar se koordinimi ndërkombëtar është çelësi për të luftuar me sukses trafikun e narkotikëve në shkallë të gjerë.