Mungesa e madhe e Kosovës, konfirmohet se Vedat Muriqi s'do të paraqitet ndaj Izraelit

Përfaqësuesja e Kosovës do të duhet të bëjë pa shërbimet e sulmuesit të saj kryesor, Vedat Muriqi, në sfidën e mbrëmjes së sotme kundër Izraelit. Lajmi është bërë i ditur nga Atdhe Nuhiu, ndihmësi i përzgjedhësit Franco Foda, gjatë një prononcimi televiziv. Nuhiu ka sqaruar se vetë lojtari ka njoftuar shtabin teknik për pamundësinë e tij për të kontribuar në këtë takim. Sipas tij, vendimi është marrë edhe si masë paraprake për të mbrojtur gjendjen fizike të futbollistit për angazhimet e radhës. Pavarësisht kësaj mungese të rëndësishme në repartin e sulmit, “Dardanët” hyjnë në fushë me një synim të vetëm: triumfin. Përfaqësuesja kërkon kthesën e madhe për të mbajtur gjallë ambiciet dhe për të ecur e sigurt drejt ngjitjes në Ligën A.