Goditje për Kosovën, Vedat Muriqi jashtë listës për sfidën kundër Izraelit

Përfaqësuesja e Kosovës do të duhet të bëjë pa shërbimet e sulmuesit të saj kryesor, Vedat Muriqi, në ndeshjen e rëndësishme kundër Izraelit. Sulmuesi nga Prizreni ka pësuar një dëmtim të lehtë muskulor gjatë seancës stërvitore të zhvilluar një ditë më parë, çka e pamundëson aktivizimin e tij për sfidën e së mërkurës. Edhe pse Muriqi provoi të stërvitej me skuadrën në prag të ndeshjes, ai sërish ndjeu dhimbje, gjë që e detyroi përzgjedhësin Franco Foda të merrte vendimin për të mos rrezikuar me gjendjen e tij shëndetësore. Pas kësaj mungese, dyshja e përbërë nga Albion Rrahmani dhe Fisnik Asllani pritet të rimarrë vendin në formacionin e parë, nën skemën taktike 3-5-2. Ndërkohë, mbetet ende e pasigurt nëse shtatlarti prizrenas do të arrijë të rikuperohet në kohë për të qenë i gatshëm në takimin e radhës që do të luhet të dielën ndaj Austrisë, në stadiumin e Prishtinës.