Rrjeta e drogës prej 200 milionë eurosh, akuza për terrorizëm dhe “zhdukja” misterioze e Enid Kasmit në Venezuelë

Një histori e mbushur me hije dyshimi rrethon fatin e Enid Kasmit, një shtetas me dy pasaporta, shqiptare dhe kolumbiane, i cili u prangos në Venezuelë më 19 maj të vitit 2025, por pak kohë më vonë drejtësia vendase humbi gjurmët e tij. Ndërkohë, Belgjika kishte vënë në lëvizje mekanizmat ndërkombëtarë për ekstradimin e tij, në kuadër të një hetimi të gjerë për narkotrafik dhe pjesëmarrje në grup të strukturuar kriminal. Sipas materialeve hetimore të zbardhura nga e përditshmja kolumbiane “El Tiempo”, Kasmi gjithashtu figuron si i pandehur në territorin venezuelas, ku po hetohet për vepra penale mjaft të rënda që përfshijnë “komplotin”, “terrorizmin, financimin e terrorizmit dhe organizatën kriminale”. Për sa i përket kërkesës belge, ajo synonte ekstradimin e tij për t'i hapur rrugë vuajtjes së një dënimi prej 12 vitesh heqje lirie, shoqëruar me një gjobë prej 560 mijë eurosh, vendosur për vepra penale në fushën e trafikut të ndërkombëtar të lëndëve narkotike. Ftesa zyrtare për ekstradimin e tij u dorëzua pranë Gjykatës së Lartë të Venezuelës më 23 korrik 2025, ndërsa autoritetet e Brukselit kishin përcjellë më parë urdhër-arrestin ndërkombëtar dhe vendimin gjyqësor të datës 29 tetor 2024. Kjo ngjarje merr shkas nga një operacion i gjerë hetimor ndërkombëtar që u fokusua te përgjimi i sistemeve të koduara të komunikimit të njohura si EncroChat. Organet e zbatimit të ligjit në Europë zbuluan se bëhej fjalë për një rrjet kriminal të dyshuar për futjen e sasive të mëdha të kokainës nga rajoni i Amerikës Latine drejt Belgjikës, për t'u shpërndarë më pas në tregjet e tjera europiane. Vlera e përgjithshme e pasurive dhe fitimeve të këtij rrjeti ndërkombëtar llogaritej në shifrat e mbi 200 milionë eurove. Grupi i hetimit ngre dyshime se Kasmi ka qenë pjesë aktive e kësaj strukture kriminale nga shkurti i vitit 2020 deri në tetor të vitit 2021. Dokumentacioni tregon se një llogari e fshehtë komunikimi, që i adresohej atij, dëshmonte përfshirjen e tij të drejtpërdrejtë në “koordinimin e importit të kokainës nga Amerika Latine”, përfshirë shfrytëzimin e linjave të transportit ajror dhe lidhjet e ngushta me baronët e furnizimit në Amerikën Jugore. Në krahun tjetër, Prokuroria Publike e Venezuelës konfirmoi se Kasmi ishte ndaluar nga shërbimet e DGCIM më 19 maj 2025, duke u dërguar menjëherë përpara një trupe gjyqësore të posaçme që merret ekskluzivisht me veprat penale të terrorizmit. Megjithatë, pikërisht në këtë pikë nis episodi i paqartë i ngjarjes. Megjithëse akti i arrestimit ishte dokumentuar zyrtarisht nga agjencitë venezuelase, muaj më vonë Gjykata e Lartë u vu në vështirësi pasi nuk arrinte të përcaktonte se ku ndodhej aktualisht i arrestuari. Dhoma Penale kërkoi të dhëna zyrtare nga instancat e Karakasit rreth ecurisë së dosjes, por deri në momentin e marrjes së vendimit nuk pati asnjë kthim përgjigje. “Deri në këtë datë nuk është marrë asnjë informacion lidhur me këtë kërkesë”, thuhet shprehimisht në dokumentin zyrtar. Kjo mungesë e plotë e të dhënave për vendndodhjen e shtetasit shqiptar paralizoi përfundimisht procesin e ekstradimit drejt shtetit belg. Gjykata argumentoi se procedurat nuk mund të ecnin përpara pa u bërë i mundur sigurimi i pranisë fizike të Kasmit, duke i lënë detyrim Prokurorisë për të ndërmarrë hapa konkretë drejt “kërkimit dhe lokalizimit” të tij. Data 20 mars 2026 shënoi një tjetër zhvillim, ku Gjykata e Lartë vendosi të mbyllë përkohësisht procedurën e ekstradimit, duke lënë hapësirë që çështja të rihapet vetëm nëse Kasmi gjendet dhe identifikohet zyrtarisht. Në këtë mënyrë, dosja mbart një kontradiktë të thellë ende të pazgjidhur: nga njëra anë ekziston regjistrimi zyrtar i arrestimit të Kasmit më 19 maj 2025 nga autoritetet venezuelase, dhe nga ana tjetër deklarata e mëvonshme e Gjykatës së Lartë se nuk ka asnjë gjurmë apo informacion mbi vendndodhjen e tij reale.