Mbështetje nga Torino: Juventusi i dërgon mesazh inkurajues Edon Zhegrovës para duelit me Izraelin

Gjiganti italian, Juventusi, ka dëshmuar sërish mbështetjen e tij për yllin kosovar, Edon Zhegrova, në prag të angazhimeve të tij me fanellën e Kombëtares së Kosovës. Klubi nga Torino ka përcjellë një tjetër mesazh dedikuar sulmuesit anësor, ndërkohë që “Dardanët” bëhen gati për sfidën e radhës ndaj Izraelit, ku synimi i vetëm është rikthimi te rezultatet pozitive. Nëpërmjet një postimi zyrtar në rrjetin social “Facebook”, “Zonja e Vjetër” ka ndarë një fotografi të futbollistit duke përfaqësuar Kosovën, shoqëruar me urimet më të mira për këtë përballje të rëndësishme. “Gati për një tjetër me Kosovën. Le të shkojmë, Edon!”, thuhet në mbishkrimin e postimit të klubit italian. Zhegrova është parashikuar të jetë pjesë e formacionit startues të Përfaqësueses së Kosovës për këtë takim, teksa përbërjet zyrtare të të dyja ekipeve pritet të bëhen publike pak çaste para fërshëllimës së parë të gjyqtarit.