Alarm për mjet shpërthyes në kryeqytet, reagon Policia e Kosovës

Policia e Kosovës ka përmbyllur me sukses verifikimin e një informate për një mjet të dyshimtë shpërthyes, e cila ishte raportuar në rrugën “Rrustem Hyseni” në qytetin e Prishtinës. Pas ndërhyrjes dhe kontrolleve të detajuara në terren nga njësitet e specializuara, është vërtetuar zyrtarisht se alarmi ka qenë fals dhe nuk ka pasur asnjë mjet shpërthyes. “Informata është trajtuar me seriozitet nga ana e policisë. Pas kontrolleve të kryera nga njësitet kompetente, është konfirmuar se nuk ka mjet shpërthyes”, ka deklaruar Enis Pllana, zëdhënës i Policisë për rajonin e Prishtinës. Në ndërkohë, strukturat hetimore të policisë, në bashkëpunim të ngushtë me prokurorin e shtetit, kanë nisur veprimet e nevojshme operative për të zbuluar dhe sqaruar të gjitha rrethanat që rrethojnë këtë ngjarje.