Maqedonia U-17 barazon me Luksemburgun, kontribut i madh i talentëve shqiptarë në Strumicë

Përfaqësuesja e Maqedonisë së Veriut për grupmoshën U-17 ka barazuar me rezultatin 1:1 ndaj Luksemburgut, në takimin e dytë miqësor të zhvilluar në qendrën stërvitore “Pandev” në Strumicë. Fraksioni i parë i lojës u karakterizua nga një lojë e matur dhe e qetë, ku të dyja kombëtaret u përpoqën të studiojnë njëra-tjetrën pa rrezikuar shumë për portë. Kështu, skuadrat u drejtuan për në dhomat e zhveshjes me rrjeta të paprekura. Me të filluar pjesa e dytë, intensiteti i ndeshjes u ngrit ndjeshëm, ndërsa mundësia më e artë për vendasit u regjistrua në minutën e 80-të nëpërmjet Marin Krstevskit. Megjithatë, futbolli dëshmoi edhe një herë rregullin e tij të pashkruar; pas rastit të lënë pa u konkretizuar, erdhi ndëshkimi nga rivalët, me Luksemburgun që kaloi në avantazh 0:1 në minutën e 89-të. Edhe pse koha ishte në ngushtësi, shpresat e Maqedonisë nuk u shuan. Vetëm dy minuta më vonë, në minutën e 90+1, pas një krosimi perfekt në zonë, Ilija Aksentiev tregua i vëmendshëm duke fluturuar mbi mbrojtjen kundërshtare dhe me kokë barazoi shifrat në 1:1, duke vulosur rezultatin përfundimtar. Trajneri Iljami Isejni hodhi në fushë nga minuta e parë një formacion të përzier, duke u dhënë hapësirë lojtarëve që kishin qenë në bankën rezervë në ndeshjen e parë, të cilën Maqedonia e kishte fituar në mënyrë bindëse me shifrat 4:1. Në këtë takim, paraqitje pozitive patën edhe futbollistët shqiptarë, ku Leart Iseini, Ejser Fetai dhe Ron Memedi e nisën sfidën si titullarë, ndërsa gjatë pjesës së dytë u futën në lojë edhe Ilan Memeti, Amar Akiki, Dardan Ademi dhe Aulon Kurtishi.