Goditje e fortë ndaj krimit: Shkatërrohet rrjeti i rrezikshëm kriminal në Prilep që shtrinte tentakulat në BE

Ministri i Punëve të Brendshme, Pançe Toshkovski, ka dhënë detaje mbi aksionin e gjerë policor të zhvilluar një ditë më parë në Prilep, duke e cilësuar atë si çmontim të një strukture të fuqishme të krimit të organizuar. Ky operacion është frymë e një angazhimi mbi 1-vjeçar, i realizuar nga MPB në bashkëpunim të ngushtë me Prokurorinë Publike dhe agjencitë e huaja partnerë. Duke folur për mediat, ministri Toshkovski bëri të ditur se bëhet fjalë për një grup tejet të rrezikshëm kriminal, pjesa më e madhe e të cilit ka operuar për mbi 15 vite, duke mbetur e paprekshme nga organet e rendit. Ai sqaroi se gjatë ditës së djeshme janë realizuar rreth tridhjetë bastisje, ndërsa kallëzimi fillestar penal do të përfshijë rreth 21 persona dhe do të përpunohet gjatë ditës. Procedurat po zhvillohen me urgjencë, nën udhëzimet e prokurorit publik. Sipas hetimeve, ekzistojnë dyshime të forta se pjesëtarë të këtij grupi kanë operuar edhe në Greqi, konkretisht në rajonin e Halkidikit dhe Kalitheas, ku dyshohet se kanë kryer krime të rënda kundër pronës, përfshirë vjedhje të nivelit të lartë. Po ashtu, hetimet dëshmojnë se elementë të këtij rrjeti kanë shtrirë aktivitetin e tyre kriminal edhe në Spanjë. Një nga personat që ndodhej në arrest shtëpiak në shtetin spanjoll kishte arritur të arratisej, por tashmë është kapur nga autoritetet vendase dhe po kalon nëpër procedurat përkatëse ligjore. "Ky është vërtet një grup i organizuar kriminal serioz që, e përsëris, vepron prej shumë vitesh jo vetëm në Maqedoni, por edhe në shtetet anëtare të Bashkimit Evropian, dhe me një veprim të gjerë të koordinuar nga Prokuroria Publike, prej më shumë se një viti, e përsëris, ky grup i organizuar kriminal është trajtuar", u shpreh Toshkovski. Në kuadër të këtij hetimi madhor, autoritetet po hetojnë edhe lidhjet e mundshme brenda radhëve të policisë. Ekzistojnë dyshime se disa efektivë kanë ndihmuar aktivitetin e grupit duke dezinformuar ose shpërndarë informacione konfidenciale, çka solli edhe kontrolle të drejtpërdrejta ndaj zyrtarëve policorë të dyshuar për bashkëpunim. Toshkovski shtoi gjithashtu se disa muaj më parë, një familjar i afërt i njërit prej të dyshuarve u vu në pranga nga policia franceze, pasi në një bunker të fshehur në automjetin e tij u sekuestruan 10 kilogramë kokainë, e cila kishte për destinacion tregun e Maqedonisë. Gjatë kontrolleve intensive të djeshme, policia ka sekuestruar mbi 120-130 mijë euro cash, si dhe rreth dhjetë automjete, ku përfshihen dy makina tip Maserati dhe dy automjete luksoze Land Rover. Njëri nga automjetet dyshohet se përdorte dokumentacion të falsifikuar, ndërkohë që operacioni hetimor po vijon edhe sot.