Seancë e tensionuar për rastin 'Pulse': Dejan Jovanov-Deko largohet nga gjykata për shkak të problemeve shëndetësore

Një atmosferë e tensionuar ka shoqëruar seancën e sotme gjyqësore për tragjedinë në diskotekën "Pulse", e cila u zhvillua në burgun e Idrizovës. Pjesë e këtij procesi ishin dëshmia e këshilltarit teknik Petre Ruseski dhe një sërë debatesh të ashpra që detyruan familjarët e viktimave të braktisnin përkohësisht sallën. Pakënaqësitë e prindërve shpërthyen gjatë pyetjeve të avokates Ivana Kocevska, e cila mbron të akuzuarin kryesor Dejan Jovanov-Deko, si dhe gjatë përgjigjeve të ekspertit mbi natyrën dhe destinacionin fillestar të ndërtesës ku ndodhej klubi nate. Debati u nxeh më tej kur avokatja iu referua familjarëve si "publik", duke nxjerrë në pah reagimin e tyre se ata janë palë e dëmtuar dhe jo thjesht shikues. Me kërkesë të trupit gjykues, familjarët dolën jashtë për t'u qetësuar, ndërsa u lejuan të riktheheshin pas një pauze të shkurtër. Situata mori një tjetër rrjedhë kur i pandehuri Dejan Jovanov-Deko u ndje keq gjatë seancës, duke shfaqur shenja marramendjeje, çka detyroi autoritetet të ndërpresin sërish punën e gjykatës. Ai u shoqërua jashtë sallës nga një efektiv i policisë së burgut për të marrë ndihmën e nevojshme. Pas normalizimit të situatës, seanca ka vijuar me pyetjen e këshilltarit teknik Petre Ruseski, i angazhuar nga mbrojtja. Qëllimi i dëshmisë së tij është kontestimi i konstatimeve të ekspertizës së deritanishme të dorëzuar nga Fakulteti i Inxhinierisë Civile në lidhje me strukturën e objektit. Kujtojmë se masa e paraburgimit për Dejan Jovanov-Deko përfundon më 3 tetor. Përfaqësuesit e tij ligjorë kanë bërë të ditur se do të dorëzojnë një propozim për garanci pasurore në vlerë prej afër 200 mijë eurosh për sigurimin e pranisë së tij në gjykatë.