Von der Leyen kërkon hapa të shpejtë për zgjedhjen e presidentit dhe thekson rëndësinë e stabilitetit për rrugën drejt BE-së

Kryetarja e Komisionit Evropian, Ursula von der Leyen, ka vlerësuar se Kosova gjendet në një udhëkryq kyç politik, ndërkohë që ka bërë thirrje të qartë për ruajtjen e stabilitetit institucional dhe intensifikimin e konsensusit ndërmjet forcave politike. Gjatë konferencës për shtyp të mbajtur pas takimit me kryeministrin Albin Kurti, zyrtarja e lartë evropiane u ndal te vendimi i Dhomave të Specializuara, duke qartësuar se bëhet fjalë ekskluzivisht për përgjegjësi ligjore individuale. “Aktgjykimi është dhënë nga një institucion i pavarur gjyqësor dhe mandati i tij duhet të respektohet. Mbrojtja ka të drejtë që të apelojë, por një gjë është e qartë: ky aktgjykim ka të bëjë me përgjegjësinë individuale të personave të pandehur. Rezistenca e Kosovës nuk ka qenë në gjykim”, u shpreh von der Leyen, duke bërë thirrje gjithashtu për nderimin e kujtesës së viktimave dhe angazhim të sinqertë drejt pajtimit. Duke analizuar zhvillimet e fundit, ajo e cilësoi si pozitiv faktin e konsolidimit të Kuvendit dhe Qeverisë, duke e konsideruar zgjedhjen e kreut të shtetit si prioritetin e radhës për vendin. “Kuvendi dhe qeveria janë themeluar, kjo është mirë. Hapi i radhës është zgjedhja e presidentit apo presidentes”, deklaroi ajo, duke shtuar se bashkëpunimi politik është parësor për mbarëvajtjen e reformave dhe zhvillimin ekonomik. Në këtë kontekst, ajo nënvizoi se “Stabiliteti institucional është themeli i gjithçkaje për reforma, për rritje dhe për përparim në rrugëtimin tuaj drejt BE-së”. Për më tepër, presidentja e KE-së rikonfirmoi mbështetjen e fuqishme financiare për Kosovën, duke bërë të ditur se përmes Planit të Rritjes vendi mund të përfitojë deri në 882 milionë euro, prej të cilave 62 milionë euro tashmë janë disbursuar si parafinancim. Ajo shtoi se Plani i Rritjes përbën një mundësi të artë për integrim më të afërt me tregun e përbashkët evropian, ndërsa u kërkoi autoriteteve vendase të përshpejtojnë reformat dhe të garantojnë funksionalitet të plotë të institucioneve. Gjatë fjalës së saj, von der Leyen veçoi edhe çështjen e roaming-ut dhe mundësinë e anëtarësimit në SEPA, duke shprehur pritshmëri për hapa konkretë pas emërimit të kryenegociatorit dhe miratimit të legjislacionit përkatës, i cili do t'i sillte kursime të konsiderueshme bizneseve të rajonit. Në rrafshin e brendshëm shoqëror, ajo theksoi domosdoshmërinë e mbrojtjes së profilit multietnik të Kosovës dhe intensifikimit të përpjekjeve për ndërtimin e urave të besimit me komunitetin serb, duke përmendur gjithashtu angazhimet e ndërmarra gjatë këtij viti rreth marrëveshjeve për personat e pagjetur. Në kuadër të agjendës së saj, kreu i Komisionit Evropian pritet të zhvillojë një vizitë në Universitetin e Prishtinës, ku do të bashkëbisedojë me studentët dhe do të inspektojë ambientet e reja të realizuara me mbështetjen e Bashkimit Evropian.