Lotët dhe telefonata që ndryshuan historinë: Prapaskena e paprecedentë e triumfit të Luka Modriç për 'Topin e Artë'

“Është një ndjenjë unike dhe nder. Kam shumë emocione që është e vështirë t’i shpreh. Të gjithë fëmijët kanë ëndrra, e imja ishte të luaja në një ekip të madh dhe të fitoja trofe. ‘Topi i Artë’ është më shumë se një ëndërr. Prandaj është nder dhe privilegj ta marr këtë trofe. Nëse e kam fituar, është sepse kam bërë diçka të veçantë këtë vit”. Këto ishin fjalët e ngarkuara me emocione të Luka Modriç, në atë kohë 33-vjeçar, të thëna në dhjetor të vitit 2018, kur ukurorëzua zyrtarisht si futbollisti më i mirë në rruzull. Tani, afro tetë vite më vonë, ish-drejtori i revistës prestigjioze “France Football”, Pascal Ferré, ka zbuluar për “RMC Sports” detajet e fshehta të atij edicioni historik dhe mënyrën se si mesfushori kroat kuptoi se kishte fituar çmimin e madh. Afërsisht dy javë përpara se të mbahej ceremonia zyrtare, Ferré kontaktoi përmes një telefonate yllin e Real Madridit për ta vënë në dijeni për vendimin e votimit. Gjatë thirrjes së parë, Modriç nuk e hapi telefonin: “Më telefonoi përsëri pas pesë ose gjashtë minutash. Dhe e njoftova se kishte fituar. I thashë: Mirë se erdhe në familjen e Topit të Artë”. Reagimi i mesfushorit ishte i papritur dhe tejet prekës: “Pastaj, nuk kisha askënd në anën tjetër të telefonit. Madje pata përshtypjen se telefonata ishte ndërprerë. Pati një heshtje emocionuese, mund t’i dëgjoja lotët e tij. Më pas e mblodhi veten dhe më pyeti nëse ishte e vërtetë. I thashë: Mos fol për këtë. A mund t’ia tregoj gruas sime, më pyeti”. Më vonë, gjatë bisedës, vetë Modriç i shpjegoi Ferrés arsyen e vërtetë pse nuk is përgjigjur në thirrjen e parë: “Kur më telefonove për të ma thënë dhe nuk u përgjigja, nuk ishte sepse isha i zënë, por sepse pashë numrin tënd në ekran dhe e dija çfarë do të më thoje. Më pushtoi emocioni dhe nuk munda të të përgjigjesha”.