Refuzimi bujshëm: Didier Deschamps i thotë “Jo” ofertës nga Turqia

Trajneri i njohur francez, Didier Deschamps, ka qenë cak i një propozimi konkret për të marrë drejtimin e përfaqësueses turke, mirëpo ai ka zgjedhur ta hedhë poshtë këtë mundësi. Sipas informacioneve të publikuara nga e përditshmja “Le Figaro”, krerët e futbollit turk kanë vendosur kontakte me ish-selektorin e “Gjelave” menjëherë pas mbylljes së Kampionatit Botëror 2026. Megjithatë, pas konsultimeve me menaxherin e tij, Jean-Pierre Bernès, strategu francez ka vendosur të mos e pranojë këtë angazhim. Pas një periudhe të gjatë prej 14 vitesh në krye të stolit të Francës, Deschamps preferon të marrë një periudhë pauze dhe reflektimi para se të hedhë hapat e radhës në karrierën e tij profesionale. Ai mbetet i interesuar për sfida të reja në të ardhmen, duke mos përjashtuar asnjë mundësi, qoftë ajo drejtimi i ndonjë skuadre të madhe evropiane, një angazhim në klubet e Gjirit Persik, apo marrja e drejtimit të një kombëtareje tjetër. Ndërkohë, sa i përket kombëtarej franceze, ajo tashmë ka hyrë në një fazë të re me Zinedine Zidane në krye të pankinës, pas përfundimit zyrtar të ciklit të suksesshëm dhe historik të Deschamps.