Ethet e Nilit Perëndimor përhapen edhe në Tetovë: Numri i të prekurve në vend arrin në 70, shënohen 9 viktima

Përhapja e etheve të Nilit Perëndimor në vend vijon edhe gjatë gjysmës së dytë të muajit shtator, ndërkohë që sëmundja ka prekur tashmë edhe qytetin e Tetovës. Sipas të dhënave zyrtare të bëra publike që nga data 22 shtator, Instituti i Shëndetit Publik ka evidentuar gjithsej 70 raste, ku 65 prej tyre janë të konfirmuara, kurse pesë të tjera mbeten të dyshimta. Gjatë javës së fundit, konkretisht në periudhën nga 16 deri më 22 shtator, janë shënuar pesë raste të ja-ra, ku tri prej tyre i përkasin kryeqytetit, ndërsa nga një rast është konfirmuar në Veles dhe në Tetovë. Pjesa më e madhe e të prekurve, gjithsej 63 persona, janë banorë të Shkupit, kurse të tjerët vijnë nga Velesi, Kumanova, Sveti Nikola, Kavadari dhe së fundmi edhe nga Tetova. Mozaiku i ri gjeografik rikonfirmon përqendrimin kryesor të infektimeve në rajonin e Shkupit. Duke u bazuar te vendndodhja e mundshme e ekspozimit, vatrat kryesore lidhen me komunën e Kisella Vodës me 15 raste dhe Gazi Babën me 14 të tilla. Më pas renditen Buteli me shtatë raste, Aerodromi me pesë dhe Ilindeni me katër. Komunat e Zelenikovës dhe Studeniçanit numërojnë nga tri raste secila, ndërsa infeksione janë shënuar gjithashtu në Qendër, Petrovec, Sopiisht, Saraj, Haraçinovë dhe Çair. Jashtë kufijve të kryeqytetit, listës i shtohen Velesi, Çashka, Kavadari, Sveti Nikola, Kumanova, Dollneni dhe së fundmi Tetova. Megjithatë, autoritetet shëndetësore theksojnë se këto zona nuk duhen parë domosdoshmërisht si adresat e sakta ku ka ndodhur infektimi. ISHP sqaron se bëhet fjalë për të ashtuquajturën “komunë të mundshme ekspozimi”, e cila përcaktohet përmes anketave epidemiologjike, llogaritjes së periudhës së inkubacionit dhe itinerarit të lëvizjes së pacientit. Këto shifra shërbejnë thjesht si një tregues indirekt i qarkullimit lokal të virusit dhe jo si vatra të verifikuara në laborator. Nga totali i 70 pacientëve të regjistruar deri më tani, 57 prej tyre janë mbi moshën 60 vjeç. Mosha mesatare e të gjithë të prekurve kap shifrën 66.5 vjeç, ku 52 prej tyre janë të gjinisë mashkullore. Për fat të keq, nëntë persona kanë ndërruar jetë si pasojë e virusit. Të gjitha viktimat ishin burra të prekur nga forma neuroinvazive e sëmundjes, të moshës 62 deri në 83 vjeç, me një moshë mesatare prej 71.1 vjeç. Përveç kësaj, tetë nga nëntë të ndjerët vuanin edhe nga sëmundje të tjera shoqëruese (komorbiditete). Astetet zyrtare tregojnë se tetë nga viktimat ishin nga Shkupi dhe një nga Kumanova. Nga 70 rastet e konfirmuara, 68 prej tyre kanë shfaqur formën neuroinvazive dhe kanë kërkuar trajtim spitalor. Deri më tani, 50 pacientë janë liruar në shtëpi pas shërimit, nëntë të tjerë po vazhdojnë mjekimin në spital, ndërsa nëntë kanë humbur jetën. Ekspertët bëjnë me dije se ky bilanc i rëndë nuk nënkupton se pothuajse të gjithë të infektuarit me virusin e Nilit Perëndimor zhvillojnë forma të rënda neurologjike. Përkundrazi, vlerësimet e autoriteteve shëndetësore evropiane dhe amerikane tregojnë se rreth 80 për qind e infektimeve kalojnë pa shenja (asimptomatike), rreth 20 për qind shkaktojnë ethe të lehta, ndërsa më pak se një për qind përparojnë në forma neuroinvazive. Përqindja e lartë e rasteve të rënda në statistikat vendase lidhet ngushtë me mënyrën se theksohet zbulimi i rasteve. ISHP rekomandon analiza laboratorike sidomos për pacientët me dyshime për encefalit, meningjit aseptik, paralizë akute flacide ose ethe me origjinë të panjohur. Si rrjedhojë, sistemi shëndetësor kap me lehtësi pacientët që përfundojnë të shtruar në spital, ndërsa pjesa dërrmuese e rasteve të lehta ose pa simptoma mbeten jashtë regjistrimeve zyrtare. Qendra Evropiane për Parandalimin dhe Kontrollin e Sëmundjeve (ECDC) e cilësoi situatën në vendin tonë si një sezon të jashtëzakonshëm të virusit të Nilit Perëndimor që në fillim të muajit shtator, sidomos për zonën e Shkupit. Në shkallë kontinentale, deri më 17 shtator ishin raportuar 1,482 raste të fituara brenda vendit në 16 shtete të ndryshme, ku Maqedonia figuronte me 66 raste brenda këtij raporti evropian, shifër e cila u rrit në 70 vetëm pesë ditë më vonë. Instituti i Shëndetit Publik konfirmon se vala më e fuqitë e përhapjes së virusit në vend u regjistrua gjatë muajve korrik dhe gusht, ndërsa shfaqja e rasteve po vazhdon edhe përgjatë muajit shtator, duke bërë që autoritetet të mbeten në gatishmëri.