Kosova lë pas festën e Irlandës, fokusi te superndeshja e të dielës ndaj Austrisë

Pas triumfit të mbrëmshëm me rezultatin minimal 1:0 kundër Irlandës, Kombëtarja e Kosovës ka nisur menjëherë punën, duke lënë pas festimet pasi në kalendar tashmë figuron përballja e madhe me Austrinë, e cila vlerësohet si skuadra favorite e grupit. Gjatë seancës stërvitore të sotme, trajneri Franco Foda ka pasur nën urdhëra 16 lojtarë. Ndërkaq, futbollistët që u aktivizuan si titullarë në sfidën e së enjtes kanë zhvilluar vetëm një stërvitje rigjeneruese brenda ambienteve të hotelit, me qëllim rikuperimin e energjive pas impenjimit fizik. Gjendja shpirtërore dhe morale brenda grupit është në nivele shumë të larta. Nisja e suksesshme e kampanjës dhe arkëtimi i tri pikëve të para kanë rritur ndjeshëm entuziazmin, por tashmë i gjithë kontingjenti është i përqendruar te detyra e radhës. Austrianët do të jenë kundërshtarët e radhës për përfaqësuesen kosovare, në një duel tepër të rëndësishëm që do të luhet të dielën në Vjenë, duke shënuar kështu një tjetër provë madhore në kuadër të këtij edicioni të Ligës së Kombeve. Pas mbrëmjes së paharrueshme në stadiumin “Fadil Vokrri”, “Dardanët” janë të vendosur të përsëritin paraqitjen e tyre energjike edhe në këtë transfertë të vështirë në tokën austriake.