Konkurs ndërkombëtar për fatin e “Tajvanit” te Parku Rinia, Rama: Tirana ka nevojë për standarde të reja arkitektonike

Kryeministri Edi Rama ka bërë të ditur gjatë prezantimit të projektit “Tirana Fountain Tower” se kryeqyteti ka kaluar në një fazë tjetër zhvillimi dhe ambiciesh, të cilat kërkojnë domosdoshmërisht transformimin e hapësirës aktuale të godinës së njohur si “Tajvani” në Parkun Rinia. Ai theksoi se për këtë pronë private do të hapë garë ndërkombëtare, ku pesë vizione të ndryshme do të vlerësohen nga një juri e specializuar. Duke iu referuar historikut të zonës, kreu i qeverisë u ndal te kujtimet e lidhura me Parkun Rinia dhe ndërtesën e “Tajvanit”, duke vënë njoftje mbi evolucionin që ka kaluar ky vend ndër vite. Sipas tij, praktika e deritanishme për nismat e rëndësishme në vend është t'i besohen ekspertëve me profil ndërkombëtar. “Sot ne rikthehemi të bëjmë atë që dimë të bëjmë më mirë kur vjen puna te zhvillimi i projekteve me rëndësi të veçantë, të cilat prej vitesh në Shqipëri ua besojmë profesionistëve me karriera të veçanta në fushën e planifikimit, projektimit arkitektonik dhe të ndërtimit të objekteve me impakt për qytetet. Sot jemi këtu për të riadresuar zhvillimin e një prone ku dikur u ngrit një park dhe më pas një ndërtesë, e cila në kohën e komunizmit ishte ndër të paktat ku njerëzit mund të takoheshin jo për mbledhje partiake, por për të kaluar kohën e lirë”, u shpreh ndër të tjera kryeministri. Duke vijuar fjalën e tij, Rama përmendi se struktura e dikurshme, e pagëzuar nga qytetarët si “Taiwani” për shkak të formave të saj të ngjashme me arkitekturën kineze, kaloi më vonë përmes procesit të privatizimit duke u shndërruar në një qendër shërbimesh. Kryeministri nënvizoi se konteksti aktual i Tiranës nuk mund të barazohet me periudhat e kaluara, qoftë ajo e viteve ’50 kur u themelua Parku Rinia, koha e ndërtimit të “Tajvanit” në fund të viteve ’70-’80, apo edhe faza e zhvillimeve para vitit 2000. “Jemi në një kohë kur nevojat dhe ambiciet janë shumë më të mëdha. Ky është një projekt i sipërmarrjes private në një pronë private, por që për shkak se ndodhet në zemër të parkut dhe kërkon rindërtim, do të ketë një ndikim të ndjeshëm në gjithë hapësirën përreth, ndaj dhe po organizojmë këtë konkurs ndërkombëtar”, përfundoi Rama.