Dyert e Bashkimit Evropian mbeten të hapura: Parisi dhe Madridi mirëpresin sinjalet për rikthimin e Britanisë

Presidenti i Francës, Emmanuel Macron, dhe kryeministri i Spanjës, Pedro Sánchez, kanë shprehur mbështetjen e tyre për një mundësi të tillë, ndërkohë që kreu i qeverisë britanike, Andy Burnham, nuk e përjashton opsionin e ribashkimit me bllokun evropian. Gjatë një vizite zyrtare në Madrid dhe takimit me homologun spanjoll, udhëheqësi francez u shpreh hapur ndaj këtij zhvillimi, duke përdorur shprehjen në gjuhën angleze “Welcome back” (Mirë se u kthyet). Sipas tij, nëse britanikët kanë vullnetin për t'u rikthyer dhe qeveria ndjek këtë rrugë, ky do të përbënte një zhvillim tejet pozitiv si për vetë shtetin ishullor, ashtu edhe për kontinentin. Megjithatë, Macron vuri theksin tek parimi i mosndarjes së favoreve, duke nënvizuar se Britania nuk mund të gëzojë një bashkëpunim selektiv. Ai shtoi se nuk mund të përfitohet vetëm nga liritë e BE-së duke përzgjedhur pjesët më të përshtatshme dhe duke shmangur detyrimet e tjera. Nga ana e tij, kryeministri spanjoll Pedro Sánchez e cilësoi largimin e Mbretërisë së Bashkuar pas referendumit të vitit 2016 si një humbje të ndjeshme, si për vetë qytetarët britanikë, ashtu edhe për mbarë nismën evropiane. Ai konfirmoi se Spanja do t'i priste sërish krahëhapur një popull vëlla, nëse do të ketë një përpjekje reale për ribashkim. Në të njëjtën linjë, zëdhënësi i Komisionit Evropian, Balazs Ujvari, në një prononcim zyrtar, e cilësoi Mbretërinë e Bashkuar si një aleat të rëndësishëm dhe të vlerësuar. Ai theksoi se vendimi për mënyrën se si do të zhvillohen marrëdhëniet në të ardhmen i takon ekzekutivit britanik, duke shtuar se Brukseli mbetet i gatshëm të shqyrtojë çdo opsion të mundshëm. Ndërkohë, në një intervistë dhënë më 30 shtator, kryeministri britanik Andy Burnham deklaroi se vendi i jo duhet të vlerësojë alternativa të ndryshme për lidhjet e tij me Bashkimin Evropian. Sipas tij, mbajtja e status quo-së është një mundësi, por ekzistojnë edhe rrugë të tjera që mund të ndiqen deri në fund. Këto opsione, sipas kreut të qeverisë britanike, mund të përfshijnë rikthimin në tregun e përbashkët ose krijimin e një unioni doganor mes dy palëve. Gjatë fjalës së mbajtur në konferencën vjetore të Partisë Laburiste më 29 shtator, Burnham u shpreh se dalja nga BE-ja ka shkaktuar më shumë dëme sesa përfitime, paralajmëruar paraqitjen e alternativave të reja në prag të samitit dypalësh të nëntorit. Çdo lëvizje drejt një afrimi apo rikthimi zyrtar rrezikon të ndezë një debat të zjarrtë politik brenda vendit. Pavarësisht se sondazhet sugjerojnë një mbështetje popullore për ribashkimin, çështje të tilla si adoptimi i monedhës euro apo kontributet në buxhetin e përbashkët mund të ndeshin në rezistencë të fortë, aq më tepër që Britania vështirë se do të siguronte sërish privilegjet speciale që gëzonte dikur. Aktualisht, Burnham mbetet i kushtëzuar nga platforma zgjedhore e laburistëve e vitit 2024, e cila përjashton rikthimin në BE apo në tregun e përbashkët. Megjithatë, nuk përjashtohet mundësia që ai ta orientojë partinë drejt një bashkëpunimi më të ngushtë në zgjedhjet e ardhshme parlamentare, të cilat duhet të zhvillohen jo më vonë se muaji gusht i vitit 2029.