Kërcënim serioz për jetën, Garry Kasparov vihet në shënjestër për eliminim fizik

Ish-kampioni i botës në shah dhe njëkohësisht disidenti i njohur rus, Garry Kasparov, ka bërë me dije se është njoftuar nga agjencitë e sigurisë të Shteteve të Bashkuara dhe Lituanisë se ai dhe bashkëpunëtori i tij i ngushtë, Ivan Tyurin, gjenden përballë një rreziku real për jetën. Përmes një reagimi të bërë publik në platformat sociale gjatë ditës së martë, Kasparov bëri të ditur se dyshja figura e opozitës është futur në listën e zezë për likuidim. Ndonëse një lajm i tillë nuk përbën ndonjë çudi të madhe duke pasur parasysh angazhimin e tij, ai pranoi se pesha e një kërcënimi të tillë mbetet tronditëse. "Fakti që unë dhe bashkëthemeluesi i Forumit të Rusisë së Lirë, Ivan Tyurin, jemi shënjestruar për eliminim nuk më erdhi si befasi e plotë, por nuk lë pa shkaktuar tronditje", shkroi ndër të tjera figura e njohur e rezistencës ruse. Më tej, ai theksoi se strukturat e inteligjencës në SHBA dhe Lituani kanë qenë ato që kanë dhënë alarmin, duke i sugjeruar fuqimisht që të shtojnë masat e vetëmbrojtjes dhe të tregojnë kujdes të lartë. "Agjencitë e zbatimit të ligjit dhe të sigurisë nga Lituania dhe Amerika na vunë në korrent për rrezikun që na kanoset, duke na kërkuar të aktivizojmë protokollet e sigurisë. Unë i kam marrë tashmë masat e nevojshme dhe do të vijoj t'i respektoj ato", u shpreh ai. Kasparov, i cili është shquar ndër vite si një ndër kundërshtarët më të ashpër të regjimit të Kremlinit dhe të kreut të shtetit rus Vladimir Putin, jeton prej kohësh në ekzil, duke drejtuar prej atje veprimtarinë e tij kundër politikave zyrtare të Moskës.