Prishtina bëhet gati për marshin gjithëpopullor në përkrahje të ish-krerëve të UÇK-së

Sot, në orën 16:00, qytetarë nga të gjitha trevat shqiptare pritet të grumbullohen në sheshin “Skënderbeu” në Prishtinë. Kjo protestë, e organizuar nga platforma “Liria ka Emër”, vjen si reagim masiv ndaj vendimit të fundit të Gjykatës Speciale, e cila më 16 shtator shqiptoi dënime drakonike prej 81 vitesh burg në total ndaj ish-udhëheqësve të Ushtrisë Çlirimtare të Kosovës. Në kuadër të këtij verdikti, Hashim Thaçi dhe Jakup Krasniqi u dënuan me nga 25 vite burgim secili, ndërsa Kadri Veseli u dënua me 18 vite dhe Rexhep Selimi me 13 vite heqje lirie. Ky vendim ka nxitur valë të vazhdueshme pakënaqësie, duke shënuar sot ditën e 15-të të protestave mbështetëse për ish-krerët e UÇK-së. Zëri i protestuesve kundër asaj që konsiderohet si një gjykim i padrejtë ka tejkaluar kufijtë e Kosovës. Tubime të ngjashme janë zhvilluar tashmë në Shkup, si dhe në shumë qytete të Shteteve të Bashkuara të Amerikës, Kanadasë, Zvicrës, Gjermanisë dhe Austrisë. Ndërkohë, organizatorët kanë bërë të ditur se vala e protestave do të vazhdojë, me një marshim tjetër të paralajmëruar për datën 10 tetor në Bruksel.