Vizita e Ursula von der Leyen në Kosovë, paralajmërohet protestë para aeroportit “Adem Jashari”

Presidentja e Komisionit Evropian, Ursula von der Leyen, do të zhvillojë sot një vizitë zyrtare në Kosovë. Në kuadër të agjendës së saj, pas mbërritjes në Aeroportin Ndërkombëtar “Adem Jashari” rreth orës 12:00, ajo do të pritet në një takim të veçantë nga Kryeministri i Kosovës, Albin Kurti. Megjithatë, mbërritja e zyrtares së lartë evropiane do të shoqërohet edhe me një organizim protestues. Para terminalit VIP të aeroportit është paralajmëruar një protestë, përmes së cilës pjesëmarrësit synojnë të shprehin kundërshtinë e tyre ndaj vendimeve të Gjykatës Speciale në Hagë, të cilat i konsiderojnë të padrejta. Në njoftimin zyrtar të këtij organizimi, thuhet se protesta do të mbahet më 1 tetor 2026, duke filluar nga ora 12:05. Organizatorët kanë theksuar se qëllimi i kësaj tubimi është shprehja e qëndrimit për drejtësinë, historinë dhe dinjitetin e Kosovës, pas, siç e quajnë ata, verdiktit antihistorik të gjykatës ndërkombëtare. Sipas njoftimit, pjesëmarrësit janë zotuar se kjo protestë do të zhvillohet në mënyrë tërësisht paqësore, duke përdorur parulla dhe mesazhe qytetare. Apeli i tyre është për një manifestim dinjitoz, pa dhunë dhe pa asnjë lloj provokimi, duke nënvizuar se zëri i rinisë është më i fuqishëm kur artikulohet me qytetari dhe kulturë.