Nisma e PDK-së për ndryshimin e Ligjit për Specialen: Juristët ngrenë pikëpyetje për zbatueshmërinë

Partia Demokratike e Kosovës (PDK) ka ndërmarrë një hap konkret për ndryshimin e Ligjit për Dhomat e Specializuara, duke synuar reformimin e mënyrës së shqiptimit dhe ekzekutimit të dënimeve për të akuzuarit. Në projektligjin e propozuar, kjo parti kërkon kufizimin e dënimit maksimal në 15 vjet burgim. Nisma legjislative parasheh që dënimet e dhëna nga kjo gjykatë të vuhen brenda territorit të Kosovës, ndërsa hap derën edhe për përfshirjen e të dënuarve në procesin e faljes presidenciale. Këto ndryshime, sipas propozuesve, do të ndikonin drejtpërdrejt në raportin e këtyre dënimeve me sistemin juridik dhe institucionet e shtetit të Kosovës. Në lidhje me këtë çështje, juristi Blerim Burjani vlerëson se propozimet në fjalë synojnë një reduktim të mandatit dhe kompetencave thelbësore të Dhomave të Specializuara. Sipas tij, një lëvizje e tillë është më tepër një aspiratë politike dhe mbetet e paqartë nëse Bashkimi Evropian, si partner kryesor normativ dhe financiar, do t'i pranojë këto ndryshime të njëanshme. “Ndryshimet dhe plotësimet e ligjit për dhomat speciale janë objektiva që ndryshojnë nga ligji aktual në fuqi. Ato synojnë reduktimin e kompetencave dhe mandatit për të cilin janë themeluar këto dhoma, duke përfshirë mundësinë e faljes nga presidenti. Mbetet të shihet si do të pozicionohet BE-ja ndaj këtyre ndryshimeve, pasi deri më tani nuk kemi pasur asnjë reagim thelbësor nga ana e tyre”, ka deklaruar Burjani. Burjani shton se, në rast se Kuvendi i Kosovës voton këto ndryshime, topi do të kalojë në fushën e Bashkimit Evropian, i cili do të duhet të sqarojë të ardhmen e funksionimit të këtyre dhomave. Po ashtu, ai thekson se dilema për zbatimin retroaktiv të këtyre normave është një çështje që varet tërësisht nga vullneti i Brukselit. Nga ana tjetër, analisti politik Arbnor Sadiku shprehet se, pavarësisht autoritetit të Kuvendit për të ndryshuar ligjet, kufizimi i dënimit maksimal në 15 vjet duhet domosdoshmërisht të jetë në harmoni me kornizën kushtetuese dhe ligjore ekzistuese të Dhomave të Specializuara. Ai thekson se Dhomat e Specializuara e konsiderojnë Ligjin 05/L-053 si bazë të detyrueshme për veprimtarinë e tyre, duke ngritur pikëpyetje për efektin juridik që do të kishin këto ndryshime në praktikë.