Revoltë e dhunshme në burgun e Pisës: Të burgosurit ngrenë barrikada, shqiptari transmeton live përplasjen

Një situatë tejet e tensionuar ka mbërthyer burgun “Don Bosco” në Pisa, ku gjatë orëve të mbrëmjes ka shpërthyer një revoltë masive. Protesta, e cila nisi rreth orës 18:00, ka marrë përmasa të gjera duke u shtrirë në disa seksione të ndryshme të këtij institucioni penitenciar. Sipas të dhënave paraprake, rreth 40 të burgosur kanë ngritur barrikada të improvizuara duke përdorur dyshekë dhe sende të tjera për të bllokuar hyrjet e seksionit ku ndodhen. Përballë forcave të rendit, të burgosurit kanë hedhur sende të ndryshme dhe ujë, ndërsa kërkojnë me ngulm një takim urgjent me drejtoreshën e burgut dhe komandantin e policisë. Për shkak të situatës kritike, forca të shtuara të policisë kanë mbërritur në mbështetje edhe nga qyteti i Firences. Ngjarja është bërë publike në kohë reale përmes rrjetit social TikTok, ku një i burgosur shqiptar ka transmetuar live pamjet e barrikadave dhe të efektivëve të policisë që qëndrojnë të pajisur me mburoja e shkopinj, gati për ndërhyrje. Në të njëjtën video, i burgosuri pretendon se shkaku i kësaj kryengritjeje ka qenë zbulimi i disa pajisjeve elektronike të dyshuara si përgjuese brenda qelive. Gjatë transmetimit dëgjohen thirrje të vazhdueshme për ndihmë mjekësore, ndërsa raportohet se disa persona kanë kërkuar asistencë shëndetësore. Po ashtu, ka informacione ende të pakonfirmuara zyrtarisht mbi përdorimin e gazit lotsjellës nga ana e forcave të sigurisë për të vënë situatën nën kontroll. Kjo revoltë vjen pas një periudhe të gjatë pakënaqësish në burgun “Don Bosco”. Organizata të ndryshme, Dhoma Penale e Pisës dhe garantuesja për të drejtat e të burgosurve kanë denoncuar prej kohësh kushtet e rënda, mbipopullimin me mbi 300 të dënuar, mungesën e higjienës, prezencën e insekteve dhe mangësitë në infrastrukturë, veçanërisht pas transferimeve të fundit nga burgu i Sollicciano-s. Aktualisht, autoritetet vijojnë përpjekjet intensive për të rikthyer rendin dhe qetësinë në të gjitha ambientet e burgut, ndërsa situata mbetet në zhvillim e sipër.