Bashkimi i partive shqiptare në Serbi, Janjiq: Lëvizje strategjike me ndikimin e Kurtit

Analisti nga Forumi për Marrëdhënie Etnike në Beograd, Dushan Janjiq, e ka vlerësuar si një zhvillim pozitiv bashkimin e forcave politike shqiptare në Serbi. Sipas tij, ky konsensus do t'u mundësojë atyre maksimizimin e votave në procesin e ardhshëm zgjedhor. Janjiq vë në dukje se në këtë përpjekje për unifikim, një rol vendimtar ka luajtur autoriteti i kryeministrit të Kosovës, Albin Kurti. Ai thekson se në rast të një gare të ngushtë ndërmjet listës së Aleksandar Vuçiqit dhe asaj të studentëve, vota e shqiptarëve do të kthehet në një faktor kyç për vendimmarrjen politike në vend. Sipas vlerësimit të tij, peshën kryesore të këtij procesi të vështirë të bashkimit e kanë mbajtur subjektet politike që deri më tani kanë pasur bashkëpunim të vazhdueshëm me institucionet serbe. Megjithatë, Janjiq mbetet skeptik për kërkesën e kryeministrit Kurti për vende të rezervuara në Parlamentin e Serbisë, duke e krahasuar atë me modelin e Kosovës për minoritetin serb. Ai sqaron se shqiptarët atje përfaqësohen përmes Këshillit Kombëtar dhe se modelet e vendeve të garantuara në Serbi aplikohen vetëm për komunitetet shumë të vogla, bazuar në marrëveshje ndërshtetërore. Analisti shton se pakica shqiptare në Luginë e sheh Kosovën si shtet amë, ndërkohë që autoritetet në Beograd, sipas tij, tentojnë ta adresojnë Shqipërinë si pikën e tyre të referencës. Ky nuk është një rast i izoluar i ndërhyrjes së faktorit shqiptar në politikën lokale të Luginës. Një marrëveshje e ngjashme ishte arritur edhe në vitin 2020 në Tiranë, ku përfaqësuesit e tri komunave kishin nënshkruar një pakt për pjesëmarrje të përbashkët në zgjedhje, në praninë e ish-ministrit për Evropën dhe Punët e Jashtme të Shqipërisë, Gent Cakaj.