SHBA i jep fund anëtarësimit në GRECO: Uashingtoni shkëput lidhjet me mekanizmin evropian kundër korrupsionit

Administrata e presidentit Donald Trump ka ndërmarrë hapin zyrtar për tërheqjen e Shteteve të Bashkuara të Amerikës nga Grupi i Shteteve kundër Korrupsionit (GRECO), mekanizëm ky në kuadër të Këshillit të Evropës, i cili mbikëqyr zbatimin e standardeve ndërkombëtare në luftën kundër korrupsionit. Lajmi është bërë i ditur nga Këshilli i Evropës, i cili konfirmoi se Uashingtoni ka dërguar njoftimin zyrtar për ndërprerjen e anëtarësimit. Me këtë lëvizje, SHBA-ja i bashkohet listës së kufizuar të shteteve që kanë braktisur këtë organizatë, ku deri më tani bënin pjesë vetëm Rusia dhe Bjellorusia. Një përfaqësues amerikan ka konfirmuar dorëzimin e njoftimit gjatë së hënës, ndërkohë që pritet një deklaratë më e detajuar nga Departamenti amerikan i Shtetit për të sqaruar arsyet prapa këtij vendimi. SHBA-ja kishte qenë pjesë aktive e GRECO-s që prej vitit 2000, duke dhënë një kontribut të vlerësuar në shkëmbimin e praktikave më të mira për parandalimin e dukurive korruptive. Nga ana tjetër, drejtuesit e GRECO-s theksuan se mbeten të gatshëm për bashkëpunim të ardhshëm me palën amerikane, veçanërisht në fushat që ndërlidhen me forcimin e integritetit dhe sundimin e ligjit. Kjo shkëputje është pjesë e një politike më të gjerë të administratës Trump për të rishikuar ose reduktuar angazhimet e SHBA-së në organizata të ndryshme shumëpalëshe, me argumentin se shpesh këto institucione shfaqin joefikasitet ose tejkalojnë kompetencat e tyre. Ky vendim vjen pas një sërë lëvizjesh të ngjashme, ku përfshihet tërheqja nga Komisioni i Venecias në janar, si dhe largimi i mëhershëm nga Organizata Botërore e Shëndetësisë dhe Këshilli i OKB-së për të Drejtat e Njeriut. GRECO, e themeluar në vitin 1999 nga Këshilli i Evropës, mbetet një mekanizëm global që tejkalon kufijtë e Bashkimit Evropian, ku SHBA-ja ishte anëtare prej më shumë se dy dekadash.