Fundi i një epoke: Cristiano Ronaldo i thotë lamtumirë përgjithmonë kombëtares së Portugalisë

Cristiano Ronaldo ka marrë një vendim të prerë dhe të pakthyeshëm: ai nuk do të jetë më pjesë e përfaqësueses portugeze. Sipas raportimeve, kapiteni legjendar i ka dhënë fund aventurës së tij me fanellën e kombëtares, duke shënuar kështu një moment historik për futbollin portugez. Zhvillimet e fundit brenda kampit të Portugalisë kanë marrë një kthesë dramatike. Ndeshja e zhvilluar ndaj Uellsit në stadiumin “José Alvalade” rezulton të ketë qenë paraqitja e fundit e 41-vjeçarit nën ngjyrat e vendit të tij. Sulmuesi i Al Nassr është larguar nga grumbullimi në Kopenhagë vetëm 24 orë para takimit të radhës. Ky vendim kulmoi pas një bashkëbisedimi që futbollisti zhvilloi me presidentin e Federatës Portugeze të Futbollit (FPF), Pedro Proença, menjëherë pas konferencës për media të trajnerit Jorge Jesus. Pak pas këtij takimi, vetë Ronaldo konfirmoi largimin përmes një njoftimi në rrjetet sociale. “Pas konferencës së trajnerit dhe bisedës me presidentin e FPF-së, vendosa të largohem nga grumbullimi i kombëtares”, shkroi ai, duke shtuar se arsyet e këtij vendimi do t’i bëjë të ditura në një moment të dytë. “Kur të jetë koha e përshtatshme, do t’ua tregoj të gjithë portugezëve të vërtetën rreth arsyeve që më shtynë drejt këtij hapi, ndaj një ekipi të cilit i jam përkushtuar gjithmonë”, deklaroi ndër të tjera ylli portugez, duke u uruar suksese bashkëlojtarëve të tij. Nëse ky vendim konfirmohet si përfundimtar, Portugalia humbet figurën e saj më të shquar. Me 234 paraqitje dhe 146 gola të shënuar, Ronaldo mban rekordin absolut si futbollisti me më shumë ndeshje dhe gola në historinë e kombëtares. Për më shumë se dy dekada, ai ka qenë udhëheqësi i padiskutueshëm, duke e udhëhequr ekipin drejt triumfit në Euro 2016 dhe Ligën e Kombeve në vitin 2019. Ndonëse në të kaluarën Ronaldo kishte reflektuar mbi mundësinë e tërheqjes, këtë herë raportimet sugjerojnë se vendimi është definitiv. Nëse kjo konfirmohet, atëherë fitorja ndaj Uellsit në “José Alvalade” mbetet zyrtarisht kapitulli i fundit i një karriere madhështore ndërkombëtare.