Blerim Latifi: Mbrojtja e ish-krerëve të UÇK-së në Hagë varet nga financimi i ekipeve të specializuara

Analisti politik, Blerim Latifi, ka vlerësuar se suksesi në fazën e apelit për ish-krerët e Ushtrisë Çlirimtare të Kosovës që po përballen me procese gjyqësore në Hagë, varet kryesisht nga kapacitetet financiare për të angazhuar mbrojtje profesionale. Sipas Latifit, diskutimet e shpeshta mbi strategjitë e ndryshme janë shpeshherë sipërfaqësore, ndërsa thelbi i betejës ligjore qëndron te cilësia e përfaqësimit juridik. Ai ka nënvizuar se përballja në shkallën e dytë kërkon avokatë me përvojë të jashtëzakonshme në raste të tilla komplekse, duke sugjeruar një qasje ndryshe nga ajo e deritanishme. “Kur dëgjoni njerëz që flasin pafund për strategji dhe zbatime të tyre, duhet ta dini se nuk po flitet për qasje serioze. Beteja vendimtare po zhvillohet në Apel dhe ajo mund të fitohet vetëm me dy kushte: angazhimin e ekipeve avokatore të specializuara dhe sigurimin e fondeve të nevojshme për ta. Në këtë kontekst, mbledhja e mjeteve financiare mbetet strategjia e vetme reale”, ka deklaruar Latifi gjatë një diskutimi televiziv.