Demaku i kundërpërgjigjet Haxhiut: PDK-ja nuk kërkon koalicion me LVV-në, por kërkon veprim për Ligjin e Speciales

Deputeti i Partisë Demokratike të Kosovës (PDK), Fadil Demaku, ka shprehur kritika të ashpra ndaj qasjes së Lëvizjes Vetëvendosje (LVV) lidhur me zhvillimet e fundit politike, veçanërisht pas vendimit dënues të Gjykatës në Hagë ndaj ish-liderëve të Ushtrisë Çlirimtare të Kosovës. Në një reagim ndaj deklaratave të kryeparlamentares Albulena Haxhiu, e cila përjashtoi mundësinë e një bashkëpunimi qeverisës me PDK-në, Demaku sqaroi se edhe partia e tij mban të njëjtin qëndrim. Megjithatë, ai theksoi se përtej divergjencave partiake, është e domosdoshme që partia në pushtet të procedojë sa më parë ndryshimet në Ligjin për Dhomat e Specializuara. “Ne dëgjojmë përditë deklaratat e tyre se nuk duan koalicion me PDK-në, por edhe ne ua kthejmë se nuk kemi asnjë interes për bashkëpunim me Lëvizjen Vetëvendosje. Megjithatë, mund të ndërmarrim hapa në interes të vendit. Nevoja urgjente për Kosovën është procedimi i Ligjit, ndërsa çështja e presidentit është një temë e dytë,” deklaroi Demaku gjatë një interviste televizive. Sipas deputetit të PDK-së, LVV-ja nuk duhet të përdorë çështjen e presidentit si mjet shantazhi apo kushtëzimi për këtë proces ligjor. Ai nënvizoi se përgjegjësia për ndryshimin e ligjit bie mbi ata që mbajnë pushtetin dhe numrat në Kuvend. “Nuk duhet të na kushtëzojnë, sepse ky Ligj nuk është obligim i PDK-së, por i atyre që kanë përgjegjësi shtetërore. Ne nuk e kemi privatizuar këtë çështje; përfituesit kryesorë të këtij veprimi nuk janë partia jonë, por qytetarët e Kosovës,” përfundoi Demaku.