Ermal Fejzullahu në protestën “Jo në emrin tim”: UÇK-ja është shtylla që na bashkon

Sheshi i Prishtinës është mbushur sërish nga një numër i konsiderueshëm qytetarësh, të cilët kanë marrë pjesë në natën e 15-të të protestës së organizuar nën moton “Jo në emrin tim”. Në mesin e qytetarëve që u bashkuan për të shprehur qëndrimin e tyre, para të pranishmëve foli edhe këngëtari i mirënjohur, Ermal Fejzullahu. Ai vuri theksin te rëndësia historike e Ushtrisë Çlirimtare të Kosovës, duke e cilësuar atë si një simbol të pashlyeshëm të identitetit tonë. “UÇK-ja është kujtesa që bashkon popullin tonë, është vetë liria për të cilën u derdh aq shumë sakrificë. UÇK-ja janë çlirimtarët, fytyrat e të cilëve i shohim në fotografi pas nesh”, deklaroi Fejzullahu gjatë fjalimit të tij. Artisti sqaroi se prezenca e tij në këtë tubim nuk ka prapavijë politike, duke u distancuar nga çdo përkatësi partiake. Ai theksoi se vendimi për të qenë pjesë e protestës erdhi si një detyrim moral si artist dhe si qytetar i këtij vendi. “Nuk jam këtu për të përfaqësuar asnjë forcë politike; jam këtu si një artist, si një qytetar i thjeshtë dhe mbi të gjitha si shqiptar. Pavarësisht dallimeve që mund të kemi në pikëpamje të ndryshme, ekziston një vlerë e përbashkët që na bën bashkë, e ajo është UÇK-ja”, përfundoi ai para masës së mbledhur.