Gati për sfidën me Izraelin: Përfaqësuesja e Kosovës mbyll përgatitjet, rikthehet në grup Leon Avdullahu

Përfaqësuesja e Kosovës ka kryer mbrëmjen e sotme seancën e fundit stërvitjore në stadiumin “Nagyerdei” në Debrecen, në kuadër të përgatitjeve përfundimtare përballë Izraelit në Ligën e Kombeve. Grupi ofron një atmosferë tejet pozitive dhe lojtarët shfaqen me moral të lartë, të vendosur për të marrë një rezultat inkurajues në këtë ballafaqim të rëndësishëm. Një lajm i mirë për stafin teknik ka qenë rikthimi i mesfushorit Leon Avdullahu në stërvitje, pasi një ditë më parë ishte detyruar të largohej përkohësisht për arsye familjare. Dueli ndërmjet Izraelit dhe Kosovës është planifikuar të zhvillohet nesër, me fshikëllimën e parë të gjyqtarit që do t'i japë startin takimit në orën 20:45.