Franco Foda paralajmëron duel të vështirë ndaj Izraelit: Janë teknikisht të fortë dhe me cilësi të larta

Përfaqësuesja e Kosovës do të matë fuqitë e saj këtë të enjte kundër Izraelit në kuadër të Ligës së Kombeve. Në prag të këtij takimi vendimtar, trajneri Franco Foda ka analizuar kundërshtarin dhe ka ndarë planet e tij taktike për sfidën e radhës. Strategu gjerman e ka vlerësuar lart kombëtaren izraelite, duke veçuar potencialin e madh individual të lojtarëve si Manor Solomon dhe Oscar Gloukh. Izraeli zbarkon në këtë përballje pas një disfate 3:1 ndaj Austrisë, ndërkohë që Kosova synon vazhdimësinë pas triumfit 1:0 ndaj Irlandës dhe humbjes 3:1 nga Austria. “Natyrisht që është skuadër shumë e fortë, pavarësisht rezultateve që i ka treguar në dy ndeshjet e fundit. Kanë futbollistë shumë të mirë, në aspektin teknik janë shumë të shpejtë, siç janë Manor Solomon, Oscar Gloukh. Prandaj presim ndeshje shumë të fortë, por normalisht që ne do të luajmë sa më agresiv që të mundemi në këtë përballje”, u shpreh Foda. Kjo do të shënojë ndeshjen e tretë në histori mes dy Përfaqësueseve. Ato janë ndeshur më parë gjatë eliminatoreve për Kampionatin Evropian “Euro 2024”, ku sfida e parë e zhvilluar në Tel Aviv u mbyll me barazimin 1:1, kurse ajo e kthimit në Prishtinë më 12 nëntor 2023 i theu izraelitët me rezultatin 1:0 falë golit të shënuar nga Milot Rashica. Për numrin një të stolin dardan, fokusi kryesor mbetet te mënyra se aftsësia e skuadrës për të zbatuar detyrat në fushën e blertë, duke paralajmëruar njëkohësisht edhe lëvizje në 11-shen startuese krahasuar me duelet e mëparshme. “Secila ndeshje është e rëndësishme për ne, është e rëndësishme mënyra se si do të luajmë, si do të paraqitemi, sa kompakt do të jemi, mënyra se si do të qasemi ndeshjes dhe normalisht po ashtu është një prej ndeshjeve ku ne do të bëjmë ndryshime në formacion krahasuar me ndeshjet paraprake”, shtoi trajneri. Ndeshja mes Izraelit dhe Kosovës është caktuar të luhet të enjten, më 1 tetor, e vlefshme për Grupin B3 të Ligës së Kombeve. Veprimtaria e dardanëve në këtë grup nisi me fitoren prej 1:0 përballë Irlandës, e pasuar nga humbja 3:1 kundër Austrisë.