“Demokracia shqiptare në pikëpyetje” – Nga Strasburgu, Berisha akuzon ashpër qeverinë për narkoshtet, krizë ekonomike dhe presion mbi mediat

Kryetari i Partisë Demokratike, Prof. Dr. Sali Berisha, gjatë vizitës së tij në Strasburg në kuadër të punimeve të Asamblesë Parlamentare të Këshillit të Europës, ka shpërndarë një videomesazh ku përmbledh temat kryesore të ngritura në këtë organizatë ndërkombëtare. Në fokus të fjalës së tij ka qenë gjendja aktuale politike në vend dhe kritikat e ashpra ndaj ekzekutivit të drejtuar nga Edi Rama. Berisha theksoi se angazhimi i tij kryesor ka qenë ekspozimi i Shqipërisë si narkoshteti i parë dhe i vetëm në kontinentin evropian, duke sjellë në vëmendje pasojat e rënda që kjo dukuri ka shkaktuar në sektorë jetikë të ekonomisë, bujqësisë, industrisë dhe në demografinë e vendit. Në materialin e bërë publik nga Këshilli i Europës, kreu i opozitës ngriti gjithashtu shqetësimin e trafikut ndërkombëtar të lëndëve narkotike. Ai vuri në dukje se vendi ynë shfaqet si një prej boshteve kryesore në tregtinë e kanabisit drejt tregjeve evropiane, ndërkohë që organizatat kriminale shqiptare luajnë rol kyç edhe në trafikimin e kokainës nga Amerika Latine. Sipas Berishës, gjatë takimeve në Strasburg ai ka kërkuar angazhimin dhe mbështetjen e autoriteteve evropiane përballë këtij fenomeni, duke e cilësuar atë si një rrezik madhor që nuk cënon vetëm të ardhmen e Shqipërisë, por edhe sigurinë e mbarë rajonit. Gjatë fjalës së tij, ish-kryeministri i kushtoi vëmendje edhe situatës në Serbi, duke dënuar përdorimin e figurës së Ratko Mlladiç në kontekstin e zhvillimeve politike atje. Ai drejtoi akuza të drejtpërdrejta ndaj presidentit serb Aleksandër Vuçiç, duke pohuar se ai mbështetet nga rryma politike të lidhura me të kaluarën e konflikteve ballkanike, dhe kërkoi ndërmarrjen e masave konkrete ndaj Serbisë nga ana e Këshillit të Europës. Për Berishën, rehabilitimi ose përdorimi i figurës së Mlladiç përbën një shkelje flagrante të vlerave themelore evropiane dhe një kërcënim serioz për paqen dhe stabilitetin rajonal. Një tjetër çështje alarmante e ngritur nga lideri demokrat ishte liria e shprehjes dhe gjendja e medias në Shqipëri. Ai pohoi se pjesa më e madhe e hapësirës mediatike ndodhet nën kontrollin e një simbioze mes pushtetit qendror, qarqeve të biznesit dhe strukturave kriminale. Duke dënuar aktet e dhunës dhe presionit ndaj gazetarëve dhe redaksive, Berisha bëri thirrje për një reagim të menjëhershëm të organizatave ndërkombëtare në mbrojtje të lirisë së informimit. Në mbyllje të mesazhit të tij nga qendra e Këshillit të Europës, Berisha përsëriti se “demokracia në Shqipëri është në agoni”, duke akuzuar qeverinë se po instilon një regjim autoritar të bazuar te paligjshmëria, korrupsioni dhe krimi i organizuar.