Humbje e rëndë për aktorin e njohur: Ndahet nga jetë në moshën 13-vjeçare vajza e Chad Lowe

Një ngjarje e rëndë ka tronditur familjen e regjisorit dhe aktorit të mirënjohur Chad Lowe, pasi vajza e tij e mitur, Fiona Hepler Lowe, është ndarë nga jeta në moshën 13-vjeçare. Lajmi tragjik është bërë i ditur nga vetë prindërit e ndjerës përmes një njoftimi zyrtar të transmetuar në revistën prestigjioze People. “Jemi thellësisht të shkatërruar nga humbja e të dashurës sonë Fiona”, deklaruan Chad Lowe dhe bashkëshortja e tij, Kim Painter, duke e kujtuar vajzën e tyre me fjalët më të ngrohta si një fëmijë mjaft të dashur, të zgjuar dhe me shpirt krijues, e cila kishte një pasion të veçantë për kërcimin. Në mesazhin prekës të familjes theksohet gjithashtu lidhja e fortë familjare: “Motrat e saj e adhuronin dhe prindërit e saj e donin thellësisht”, thuhet ndër të tjera në deklaratë. Duke e quajtur Fionën “dritën e jetës sonë”, familja ka përcjellë një apel për mirëkuptim, duke kërkuar që privatësia e tyre të respektohet gjatë kësaj kohe tejet të dhimbshme. Vlen të përmendet se në njoftim është përfshirë edhe numri i linjës amerikane të ndihmës për shëndetin mendor 988, ndërkohë që nuk janë bërë publike detaje shtesë rreth shkaqeve apo rrethanave të kësaj tragjedie. Fiona kishte ardhur në jetë më 16 nëntor 2012 dhe ishte fëmija i dytë i çiftit. Chad Lowe dhe Kim Painter, të cilët kurorëzuan lidhjen e tyre në martesë në vitin 2019, janë prindër edhe të dy vajzave të tjera, Mabel 17-vjeçare dhe Nixie 10-vjeçare.