Mehmeti: Votimi i Kuvendit për Specialen është thjesht një shfaqje dhe përpjekje e PDK-së për shfajësim

Kuvendi i Kosovës ka miratuar të hënën një deklaratë zyrtare lidhur me vendimin e Gjykatës Speciale në Hagë ndaj katër ish-krerëve të Ushtrisë Çlirimtare të Kosovës. Lidhur me këtë zhvillim, analisti politik Faton Mehmeti ka theksuar se ky votim mbetet pa kurrfarë ndikimi juridik mbi vendimet e deritanishme të Gjykatës Speciale, duke e cilësuar atë si një strategji të Partisë Demokratike të Kosovës për t'u arsyetuar për rolin e saj në krijimin e kësaj gjykate. Sipas tij, ky hap nuk prodhon asnjë rezultat real në situatën aktuale, por përbën vetëm një tentativë për amnisti politike nga ana e PDK-së për themelimin e këtij institucioni drejtësie. Mehmeti ka kritikuar gjithashtu edhe Lidhjen Demokratike të Kosovës, duke vlerësuar se kjo forcë politike është dashur të mbahej neutrale dhe të abstenonte nga mbështetja e kësaj nisme, sidomos duke pasur parasysh se aktakuza përmend raste të vrasjeve të zyrtarëve të PDK-së. Ai ka shtuar se LDK-ja i ka shkaktuar dëm vetes duke u distancuar nga parimet dhe tradita e saj, duke e kthyer veten në një subjekt që udhëhiqet nga interesa të ngushta dhe pazare politike. Në përmbyllje të qëndrimit të tij, Mehmeti ka shprehur keqardhje për degradimin politik të LDK-së, duke ritheksuar se ky subjekt nuk duhej t'i bashkohej kësaj axhende që sipas tij nuk përbën program partiak, por thjesht një spektaklodhe shfajësim politik nga ana e PDK-së.