Vazhdimësi në horizont: Lionel Scaloni dhe Argjentina drejt marrëveshjes së re

Lionel Scaloni është gdhendur në histori si një prej strategëve më të suksesshëm në krye të kombëtares së Argjentinës, duke i dhënë fund një agonie 28-vjeçare pa trofe për “Albicelesten”. Punësimi i tij solli një epokë të artë, e cila kulmoi me triumfin në Kupën e Botës, dy Kupa të Amerikës dhe një trofe të Finalissima-s, duke shkruar kështu njërën nga faqet më të ndritura të futbollit argjentinas. Pavarësisht këtyre arritjeve, humbja në finalen e Kupës së Botës 2026 përballë Spanjës ngriti pikëpyetje rreth së ardhmes së tij, me trajnerin që kishte lënë të kuptohej se mund të largohej me përfundimin e marrëveshjes aktuale. “Deri në dhjetor do të vazhdoj. Pastaj do të flas me presidentin, Claudio Tapian. Ideja është të qetësohem dhe të ndalem pak. Deri në dhjetor do të vazhdoj dhe më pas me siguri do të largohem. Nuk e di nëse mund të bëhet diçka më e madhe se kjo dhe duhet ta shohim. Është e drejtë që të mund ta marr këtë kohë dhe të mendohem”, kishte deklaruar Scaloni. Megjithatë, skenari ka marrë një kthesë rrënjësore gjatë kohëve të fundit. Pas tentativave të Federatës Argjentinase të Futbollit (AFA) dhe presidentit Claudio “Chiqui” Tapia për të siguruar vazhdimësinë e projektit teknik, palët kanë gjetur sërish gjuhën e përbashkët drejt një akordi të ri. Sipas gazetarit argjentinas Gastón Edul, qëndrimet e dy kampeve janë afruar ndjeshëm, duke e bërë zgjatjen e bashkëpunimit një mundësi shumë konkrete. Baza e re e ofruar nga AFA parashikon një formulë prej 2+2 vitesh, e cila do ta mbante Scalonin në drejtimin e skuadrës të paktën deri në Kupën e Amerikës 2028, me hapësirë për të vijuar deri në Kupën e Botës 2030. Vetë numri një i stolit argjentinas ka pranuar se dialogu me krerët e federatës tashmë ka hyrë në rrugën e duhur. “Fotoja me Chiqui Tapian? Sapo kemi filluar të bisedojmë. Vullneti nga të dyja palët është dhe kjo është gjëja më e rëndësishme”, u shpreh Scaloni përpara duelit kundër Bolivisë. Në këtë mënyrë, shihet qartë se Scaloni pritet të udhëheqë skuadrën kombëtare edhe përgjatë fazës së tranzicionit në periudhën pas Lionel Messit. Kujtojmë se ylli argjentinas dhe fituesi i tetëfishtë i “Topit të Artë”, Lionel Messi, ka bërë të ditur se rrugëtimi i tij si kapiten dhe numri 10 i “Albicelestes” po i afrohet fundit.