Përplasje e ashpër në Komisionin e Kulturës: Ina Zhupa thumbon Ramën për dosjet e SPAK-ut, digjohet kundërpërgjigjja e socialistëve

Mbledhja e sotme e Komisionit të Kulturës është shoqëruar me debate të nxehta politike, ku në qendër të vëmendjes kanë qenë agjenda dhe zhvillimet e fundit rreth kryeministrit Edi Rama. Kreu i qeverisë dhe paraqitja e tij publike u bënë mollë sherri mes opozitës dhe mazhorancës, pasi kryetarja e komisionit, Ina Zhupa, e nisi fjalën e saj duke komentuar pjesëmarrjen e kreut të ekzekutivit në Samitin e Turizmit të zhvilluar një ditë më parë në Bruksel. “Pashë një kryeministër që me trup ishte para gazetares, por me mendje ishte duke lexuar dosjet e SPAK-ut sa herë i ka dalë emri, sa herë përflitet për takimet e tij dhe mesazhet me Vlora Hysenin, Ergys Agasin, me të gjithë grupin e strukturuar kriminal”, u shpreh gjatë fjalës së saj deputetja demokrate Ina Zhupa. Gjatë seancës, Zhupa shfaqet e përgatitur duke nxjerrë në pah edhe librin e njohur “Albanian Files” (Dosjet Shqiptare), i cili përmban projekt-idetë e arkitektëve të huaj dhe për të cilin Partia Demokratike ka dorëzuar tashmë një kallëzim zyrtar në Prokurorinë e Posaçme. “Mendova se do e kishte marrë me vete librin te strategjia e turizmit, por ka frikë se është dosje SPAK-u. I rëndonte ndërgjegjen po ta mbante në dorë”, shtoi më tej ajo në replikat e saj. Nuk ka vonuar reagimi nga ana e përfaqësuesve të Partisë Socialiste, ku nënkryetari i komisionit Erion Malaj dhe anëtarët e tjerë i janë kundërpërgjigjur akuzave të opozitës. “Nuk e vija në diskutim që ju do vendosnit kasetën, përsërisni të njëjtat gjëra. Por ju them se unë nuk përfaqësoj 800 mijë shqiptarë që votuan PS. Kjo narrativë se kryeministri nuk është në lartësinë e duhur për të përfaqësuar Shqipërinë në një event turizmi, nuk qëndron”, u shpreh Erion Malaj. Ndërkohë, deputetja Briseida Çakërri ka ndërhyrë duke thënë: “Mos na e qani hallin ne, ne jemi këtu për Shqipërinë dhe shqiptarët”. Në të njëjtën linjë, deputeti dhe shkrimtari Loer Kume zgjodhi të përdorë gjuhën e metaforave për t'iu kundërvënë qëndrimeve të opozitës gjatë diskutimit. “Sot kanë dritën e skenës dy entitete, i pari është drejtësia që vazhdon punën e saj, i dyti, shkrimtarët që ndahen në shkrimtarët të vegjël, të mesëm dhe të mëdhenj që merren me idetë e të nesërmes”, deklaroi ai. Reagimi i krejares së komisionit, Ina Zhupa, nuk vonoi ndaj këtyre deklaratave, duke i kthyer përgjigje me një tjetër mesazh politik: “Ka dy lloj politikanësh. Mediokër që mendojnë për zgjedhjet e radhës dhe ka politikanë të mëdhenj që mendojnë për gjeneratat e radhës”. Pas rreth gjysmë ore debatesh të ashpra, situata në komision është qetësuar, duke lejuar që mbledhja të vijojë normalisht sipas rendit të ditës të parashikuar për shqyrtimin e projektligjit për të drejtat e autorit.