Aktivizohet Këshilli për Siguri në Punë, Hoti: Mbi 290 ndalesa nga mbi 8 mijë inspektime

Ministria për Punë, Familje dhe Vlerat e Luftës Çlirimtare ka mbajtur mbledhjen inauguruese të Këshillit Nacional për Siguri dhe Shëndet në Punë (KNSSHP). Gjatë këtij takimi u shqyrtuan mekanizmat për mbrojtjen e punëmarrësve, parandalimin e ngjarjeve fatkeqe në ambientet e punës dhe forcimin e kapaciteteve institucionale. Në fjalën e tij, ministri Andin Hoti vlerësoi se ruajtja e jetës dhe shëndetit të punëtorëve duhet të përbëjë synimin kryesor të çdo vendimi shtetëror, duke shtuar se përfitimet financiare apo afatet kohore nuk mund të kenë prioritet mbi integritetin fizik të qytetarëve. “Prandaj ne gjatë këtij viti, prej fillimit të mandatit të parë, sepse ky është mandati i dytë i shkurtër, ne kemi marrë disa hapa konkretë për të forcuar mbrojtjen e sigurisë dhe shëndetit në punë”, u shpreh Hoti. Sipas tij, gjatë muajit prill u ndërmorën hapa urgjentë për shtimin e kontrolleve në terren, me vëmendje të veçantë në sektorët me rrezikshmëri të lartë për jetën. “Në muajin prill, siç edhe ju kemi njoftuar disa herë, ne kemi ndërmarrë masa emergjente për intensifikimin e inspektimeve me fokus të veçantë në vendet e punës me rrezikshmëri të lartë. Në kuadër të veprimtarisë inspektuese janë ndërmarrë mbi 290 masa për ndalimin e punimeve për shkak të shkeljeve të evidentuara nga 8,608 inspektime të realizuara brenda vetëm shtatë muajve”, tha ministri. Hoti vuri theksin edhe te modernizimi i procesit të mbikëqyrjes, duke njoftuar se Inspektorati Qendror i Punës ka kaluar të Jtërësisht në sistem digjital. “Kemi avancuar digjitalizimin e inspektimeve dhe siç e dini tashmë veç ka kaluar Inspektorati Qendror i Punës në inspektim digjital të plotë. Kemi marrë vendimin për përdorimin e dronëve, të cilët janë një mjet mbështetës për mbikëqyrjen e kantierëve dhe të vendeve me rrezikshmëri të lartë. Përmes këtyre ndryshimeve ne kemi synuar dhe synojmë një dokumentim më të saktë, një transparencë më të madhe dhe edhe reagim më të shpejtë ndaj shkelësve të saj”, deklaroi ai. Krahas kësaj, ai bëri të ditur se autoritetet po finalizojnë procedurat për punësimin e 39 inspektorëve të rinj, ku një pjesë e intervistave tashmë kanë përfunduar, ndërsa të tjerat janë në zhvillim e sipër. “Njëkohësisht jemi në finalizim të procedurave për rekrutimin e 39 inspektorëve të rinj. Disa prej intervistave veç kanë kaluar, disa të tjera janë në fazën e intervistimit. Në fushën e marrëdhënieve të punës dhe sigurisë e shëndetit në punë, po i forcojmë kapacitetet e Inspektoratit Qendror të Punës për një mbikëqyrje më të gjerë, më efektive në terren”, theksoi Hoti. Në vijim, ministri paralajmëroi nisjen e një fushate gjithëpërfshirëse ndërgjegjësimi në nivel vendi, që synon informimin e punëdhënësve mbi detyrimet ligjore dhe njohjen e punëtorëve me të drejtat e tyre dhe mënyrat e denoncimit të parregullsive. “Po përgatitim edhe një fushatë kombëtare për vetëdijesimin për sigurinë dhe shëndetin në punë, sepse ne duam që punëdhënësit në radhë të parë t’i përmbushin detyrimet e tyre konform legjislacionit në fuqi, por edhe punëtorët në Republikën e Kosovës të jenë më shumë të informuar për të drejtat e tyre dhe mënyrën e raportimit të abuzimeve”, tha ai. Në fund, Hoti shprehu mirënjohjen e tij për punën e palodhur të Inspektoratit Qendror të Punës dhe trupës inspektuese, duke vlerësuar kontributin e tyre në zbatimin e reformave digjitale dhe ngritjen e standardeve të sigurisë. “Në këtë rast dua të vlerësoj edhe angazhimin e Inspektoratit Qendror të Punës dhe inspektorëve të saj dhe të gjithë atyre që kanë kontribuar në këto reforma”, përfundoi ministri.