Nata e 15-të e protestës “Jo në emrin tim”: Ermal Fejzullahu, Alban Dudushi dhe Korab Shaqiri ngjiten sonte në skenë

Figura të njohura të skenës dhe medias do të jenë pjesë e tubimit të sotëm qytetar. Artisti i mirënjohur Ermal Fejzullahu, gazetari i njohur nga Shqipëria Alban Dudushi, si dhe kantautori Korab Shaqiri do t'i drejtohen të pranishmëve në natën e 15-të të protestës “Jo në emrin tim”, e cila do të zhvillohet në sheshin “Skënderbeu” në kryeqytet. Sipas agjendës zyrtare të kësaj mbrëmjeje, krahas tyre do të fjalosë edhe organizatori i kësaj nisme, Çlirim Haziri, ndërsa recitimi i betimit të ushtarit do të interpretohet nga veterani i Ushtrisë Çlirimtare të Kosovës, Fazli Muharremi. Ky organizim qytetar është caktuar të nisë duke filluar nga ora 21:00. Këto tubime vazhdojnë të mbahen nën shenjën e kundërshtimit të vendimit të Gjykatës Speciale ndaj ish-udhëheqësve të UÇK-së, duke përsëritur thirrjet për hapa konkretë institucionalë në mbrojtje të figurës së tyre. Ngjarja e mbrëmshme shërben gjithashtu si prelud për protestën masive të paralajmëruar për nesër, më 1 tetor, e cila do të mbahet në orën 16:00 në të njëjtin shesh.