Gara për “Topin e Artë”: Al-Khelaifi zbulon tre favoritët e tij nga radhët e PSG-së

Këtë periudhë, ylli i ri Lamine Yamal po përflitet si një nga pretendentët kryesorë për të rrëmbyer “Topin e Artë”. Falë një nisjeje fantastike të sezonit si me fanellën e Barcelonës ashtu edhe me kombëtaren e Spanjës, 19-vjeçari mund të shkruajë historinë duke u shpallur fituesi më i ri i këtij trofeu prestigjioz individual që ndahet nga revista “France Football”. Tifozët dhe njohësit e futbollit do të duhet të tregojnë durim deri më 26 tetor, datë kur do të mbahet ceremonia madhështore dhe zbulimi zyrtar i fituesit në qytetin e Londrës. Ndërkohë, kreu i Paris Saint-Germain, Nasser Al-Khelaifi, ka bërë publike preferencat e jo pak njerëzve, duke veçuar tre futbollistë nga ekipi i drejtuar nga Luis Enrique, të cilët sipas tij e meritojnë plotësisht këtë çmim. “Do të më fusni në telashe me klubet e tjera. Kam respekt të madh për të gjithë lojtarët, si Kylian apo Yamal. Ata janë lojtarë të jashtëzakonshëm. Sigurisht, e njoh shumë mirë Kylian. Ai është një lojtar i jashtëzakonshëm dhe me talent, dhe padyshim një nga më të mirët në botë”, u shpreh ai. “Natyrisht, do të zgjidhja një nga lojtarët e mi. Kemi tre: Dembélé, Kvaratskhelia dhe gjithashtu Fabián Ruiz. Fabián Ruiz është i vetmi që ka fituar çdo trofe. Kështu që, mendoj se Dembélé, Kvara dhe Fabián Ruiz e meritojnë, sepse i fituan të gjitha. Mendoj se luajtën shumë mirë; ishin fantastikë”, përfundoi kreu i klubit parizien.