Gjykata e Hagës shtyn afatin për njoftimet e Apelit në çështjen e ish-krerëve të UÇK-së

Paneli i Gjykatës së Apelit pranë Dhomave të Specializuara në Hagë ka vendosur të aprovojë pjesërisht kërkesën e paraqitur nga mbrojtja, duke zgjatur kështu afatin kohor për dorëzimin e njoftimeve të apelit lidhur me aktgjykimin ndaj Hashim Thaçit, Kadri Veselit, Jakup Krasniqit dhe Rexhep Selimit. Bazuar në njoftimin e institucionit, si pala mbrojtëse ashtu edhe Zyra e Prokurorit të Specializuar janë pajisur me afat deri më 27 nëntor 2026 që të dorëzojnë njoftimet e tyre zyrtare për hapat që do të ndërmarrin në kuadër të shkallës së dytë të gjykimit. Ndërkohë, trupi gjykues ka porositur të dyja palët që të respektojnë rreptësisht rregullat që udhëheqin dorëzimin e parashtresave për procedurat e apelit. Njëkohësisht, Zyra e Regjistrimit është ngarkuar me detyrën që t'i raportojë Trupit Gjykues të Apelit mbi ecurinë e përkthimit të vendimit të shkallës së parë në gjuhën shqipe, si dhe afatin kohor se kur pritet të përmbyllet ky proces. Në udhëzimet e dhëna, Trupi Gjykues ka rikujtuar parimin se dokumentet dhe parashtresat e dorëzuara në këtë gjykatë duhet të jenë plotësisht publike, përveç rasteve kur paraqiten arsye të forta dhe të jashtëzakonshme për t'i ruajtur ato si konfidenciale. Palët janë thirrur që të ofrojnë versione publike të redaktuara për çdo parashtresë të tyre. Për këtë arsye, mbrojtja është udhëzuar që brenda një periudhe prej dhjetë ditësh nga pranimi i këtij vendimi, të dorëzojë një version publik të redaktuar të vetë kërkesës që kishte paraqitur më parë. Në argumentimin e saj, mbrojtja kishte kërkuar fillimisht shtyrjen e afatit deri më 15 dhjetor 2026, duke sjellë si argument kompleksitetin dhe volumin e jashtëzakonshëm të aktgjykimit të shkallës së parë, elemente këto që përbëjnë motive legjitime për zgjatjen e afateve procedurale. Si një pengesë shtesë, mbrojtja kishte theksuar mungesën e përkthimit të vendimit në gjuhën amtare shqipe, si dhe faktin se të akuzuarit e kanë të pamundur ta kuptojnë aktgjykimin në gjuhën angleze, gjë që vështirëson ndjeshëm punën përgatitore. Sipas ekipit mbrojtës, kjo situatë i detyron ata të mobilizojnë burime të shtuara financiare dhe njerëzore vetëm për çështjen e përkthimit, aspekt ky që cenon drejtpërdrejt kapacitetin e tyre për të përgatitur në kohë njoftimin për apel. Në fund të parashtrimeve të saj, mbrojtja ka theksuar se kërkesa për shtyrje nuk cenon interesat e palëve të tjera dhe nuk sjell asnjë dëm apo vonesë të pajustifikueshme në mbarëvajtjen e drejtë dhe të shpejtë të procesit gjyqësor.